विराटनगर । देशका विभिन्न भागमा फैलिएको बर्डफ्लु संक्रमण अहिले पूर्ण रूपमा नियन्त्रणमा आएको पशु सेवा विभागले जनाएको छ।
विभागका अनुसार १ साउनयता देशको कुनै पनि स्थानमा बर्डफ्लुको नयाँ संक्रमण पुष्टि भएको छैन ।
पछिल्लो पटक काठमाडौं महानगरपालिका–गोकर्णेश्वर नगरपालिका–१, सुन्दरीजलमा संक्रमण पुष्टि भएको थियो।
त्यसयता नयाँ संक्रमण नदेखिएको विभागले जनाएको छ। पछिल्लो संक्रमण चैत ४ गते मोरङको उर्लाबारी–८ र सुन्दरहरैंचा–४ मा पुष्टि भएको थियो। त्यस अवधिमा बर्डफ्लु देशका ११ जिल्लामा फैलिएको थियो, जसका कारण पन्छीपालक किसानले ठूलो क्षति व्यहोर्नुपरेको थियो।
बर्डफ्लु नियन्त्रणमा आएसँगै बजारमा कुखुराको मासु र अण्डाको माग तथा खपत पनि पुनः बढ्न थालेको विभागले जनाएको छ।
