काठमाडौं । शंकर ग्रुपका अध्यक्ष शंकर अग्रवाल फेरि पक्राउ परेका छन्। नेपाल प्रहरीको केन्द्रीय अनुसन्धान ब्युरो (सीआईबी)को टोलीले उनलाई काठमाडौं महानगरपालिका–३० डिल्लीबजारबाट पक्राउ गरेको हो।
सीआईबीका प्रवक्ता एसएसपी अनुप शमशेर जबराका अनुसार अग्रवाललाई बैंकिङ कसुरसम्बन्धी उच्च अदालत पाटनमा विचाराधीन मुद्दाका आधारमा पक्राउ गरिएको हो।
नेपाल राष्ट्र बैंकको जाहेरीका आधारमा दर्ता भएको दीपक भट्टसमेत जोडिएको बैंकिङ कसुर तथा सजाय ऐन, २०६४ अन्तर्गतको मुद्दामा फरार रहेका अग्रवाललाई नियन्त्रणमा लिइएको प्रहरीले जनाएको छ।
पक्राउ परेका अग्रवाललाई आवश्यक कानुनी कारबाहीका लागि बुधबार नै उच्च अदालत पाटनमा उपस्थित गराइएको सीआईबीले जनाएको छ।
यसअघि पनि सीआईबीले उनलाई गत चैत २० गते सम्पत्ति शुद्धीकरणसम्बन्धी कसुरमा पक्राउ गरेको थियो। उक्त प्रकरणमा अनुसन्धानपछि उनी चैत २२ गते रिहा भएका थिए।
