विराटनगर । सरकारले कर प्रणालीमा आबद्ध उपभोक्तालाई प्रोत्साहन गर्ने उद्देश्यले ‘करदाता प्रोत्साहन उपहार कार्यक्रम’ कार्यान्वयनमा ल्याएको छ।
अर्थ मन्त्रालयले ‘कर प्रोत्साहन उपहार सञ्चालन कार्यविधि’ स्वीकृत गरेसँगै यो योजना लागू भएको हो।
कार्यविधिअनुसार अब प्रत्येक दिन एक जना उपभोक्तालाई नगद पुरस्कार प्रदान गरिनेछ। त्यसैगरी, हरेक महिना गोलाप्रथामार्फत दुई जना भाग्यशाली उपभोक्ताले जनही १० लाख रुपैयाँ बराबरको बम्पर पुरस्कार प्राप्त गर्नेछन्।
यो योजनामा सहभागी हुन उपभोक्ताले १०० रुपैयाँभन्दा बढीको सामान खरिद गर्दा वा होटल तथा रेस्टुरेन्टमा सेवा लिँदा अनिवार्य रूपमा सक्कली बिल लिनुपर्ने व्यवस्था गरिएको छ ।
अर्थ मन्त्रालयका अनुसार हालका लागि प्रत्येक महिनाको १६ गते र महिनाको अन्तिम दिन गरी पाक्षिक रूपमा लखपति योजनाको नतिजा सार्वजनिक गरिनेछ।
