विराटनगर । भूमि समस्या समाधान समितिले विभिन्न जिल्लाका भूमिहीन दलित, भूमिहीन सुकुमबासी तथा अव्यवस्थित बसोबासीका लागि जग्गा प्राप्ति र व्यवस्थापन सम्बन्धी ३५ दिने आवेदन खुला गरेको छ।
समितिले सोमबार सार्वजनिक गरेको सूचनाअनुसार सरकारले भूमिहीन दलित र सुकुमबासीलाई जग्गा उपलब्ध गराउने तथा अव्यवस्थित बसोबासीको व्यवस्थापन गर्ने योजनाअन्तर्गत योग्य नागरिकलाई निवेदन दिन आह्वान गरेको हो।
आवेदन दिन इच्छुक योग्य व्यक्तिहरूले समितिले तोकेको ढाँचाअनुसारको निवेदन फाराम भरी साउन ४ गते देखि ३५ दिनभित्र सम्बन्धित स्थानीय तहका वडामा खटिएका लगत संकलकमार्फत पेश गर्नुपर्नेछ।
समितिका अनुसार यो सूचना कोशी, मधेश, बागमती, गण्डकी, लुम्बिनी र कर्णाली प्रदेशका विभिन्न जिल्लाका तोकिएका स्थानीय तहमा लागू हुनेछ।
