विराटनगर। मोरङको सुन्दरहरैंचा नगरपालिका–१० स्थित सुकुना माध्यमिक विद्यालयमा शिक्षकले विद्यार्थीमाथि दुर्व्यवहार गरेको भन्ने विषयलाई लिएर शिक्षकविरुद्ध प्रदर्शन गर्ने योजनामा संलग्न रहेको आरोपमा प्रहरीले थप तीन जनालाई पक्राउ गरेको छ।
जिल्ला प्रहरी कार्यालय मोरङका अनुसार घटनाको अनुसन्धानका क्रममा संलग्न देखिएका सुन्दरहरैंचा–१० का ४० वर्षीय प्रदीप भट्टराई, सुन्दरहरैंचा–२ का ३० वर्षीय किशोरलाल गच्छदार र सुन्दरहरैंचा–१२ का २५ वर्षीय अविलाल मार्फेलाई साउन ४ गते बिहान १० बजे नियन्त्रणमा लिई थप अनुसन्धान अघि बढाइएको हो।
प्रहरीले घटनाको अनुसन्धान जारी रहेको जनाउँदै अनुसन्धानपछि अन्य व्यक्ति पनि संलग्न रहेको खुले कानुनबमोजिम कारबाही गरिने जनाएको छ।
यसैबीच जिल्ला प्रहरी कार्यालय मोरङले अनुसन्धान प्रभावित हुने गरी सामाजिक सञ्जालमा अनावश्यक टिप्पणी, अफवाह वा भ्रामक सूचना नफैलाउन सबैमा अनुरोध गरेको छ।
