काठमाडौं। रास्वपा प्रवास नेपाली सम्पर्क विभाग, जापानले सांसद शाहीले फेसबुक लाइभमार्फत दिएको अभिव्यक्तिप्रति गम्भीर आपत्ति जनाएपछि शाहीले सामाजिक सञ्जाल फेसबुकमा व्यंग्यात्मक स्टाटस लेखेका छन्।
आइतबार जारी प्रेस विज्ञप्तिमा रास्वपा प्रवास नेपाली सम्पर्क विभाग, जापानले सांसद शाहीले तथ्य नबुझी सामाजिक सञ्जाल प्रयोगकर्ता तथा रास्वपाका समर्थकलाई लक्षित गर्दै अपमानजनक, असंयमित र गैरजिम्मेवार अभिव्यक्ति दिएको आरोप लगाएको थियो। विभागले लोकतान्त्रिक मूल्य–मान्यता, राजनीतिक मर्यादा र सार्वजनिक पदको गरिमाविपरीत हुने गरी अभिव्यक्ति दिएको भन्दै शाहीलाई आत्मसमीक्षा गर्न तथा सार्वजनिक रूपमा क्षमायाचना गर्न आग्रह गरेको थियो।
उक्त विज्ञप्तिपछि शाहीले फेसबुकमा व्यंग्यात्मक शैलीमा लेखेका छन्, “जापानको रक्सी पनि कडा रहेछ, वर्षौँदेखि मनमा लुकाउन खोजेका केही सत्य कुरा पनि मुखबाट फुत्त निस्किएछन्। सहकारी ठगलाई ठग नै भनिएछ, गँजडी ग्याङलाई गँजडी ग्याङ नै भनिएछ, खराने ग्याङलाई खराने ग्याङ नै भनिएछ, टीओबी ग्याङलाई टीओबी ग्याङ नै भनिएछ।”
उनले त्यसपछि सामाजिक सञ्जाल प्रयोगकर्तालाई लक्षित गर्दै “आज त कन्टेन्टको कमी छैन, जति रोस्ट गर्न मन छ गर, जति स्टाटस लेख्न मन छ लेख, नेपाल जाने भाडा पनि मलाई जुटाइदेऊ” भन्दै अर्को व्यंग्यात्मक टिप्पणीसमेत गरेका छन्।
