विराटनगर- सुनसरीको इटहरी उपमहानगरपालिका-२० तरहरास्थित सेउती खोला आसपास क्षेत्रमा ४०० वटा विभिन्न प्रजातिका बिरुवा रोपिएको छ।
‘सेभ द अर्थ फ्रम ए टु जेड’ र ‘वी आर वान फ्यामिली’ भन्ने नाराका साथ वातावरण संरक्षण अभियान सञ्चालन गर्दै आएको आसेज वाओले हरित पृथ्वी निर्माणको उद्देश्यलाई आत्मसात् गर्दै वृक्षरोपण गरेको हो।
आसेज वाओका सदस्य नवीन राना मगरका अनुसार वातावरण संरक्षण, जैविक विविधताको संरक्षण तथा स्वच्छ र हरियाली वातावरण निर्माणका लागि संस्थाले निरन्तर सामाजिक अभियान सञ्चालन गर्दै आएको छ।
वृक्षरोपण कार्यक्रममा इटहरी उपमहानगरपालिका-२० का वडा अध्यक्ष मणिराम श्रेष्ठ र तरहरा सब-डिभिजन वन कार्यालयका अधिकृत विन्देश्वर साहको समेत उपस्थिति थियो।
वृक्षरोपणले सेउती खोला क्षेत्रको सौन्दर्य वृद्धि गर्नुका साथै वातावरणीय सन्तुलन कायम गर्न, जैविक विविधता संरक्षण गर्न र खाली स्थानलाई हरियाली क्षेत्रमा रूपान्तरण गर्न महत्त्वपूर्ण योगदान पुर्याउने विश्वास गरिएको छ।
आयोजक आसेज वाओले आगामी दिनमा पनि वातावरण संरक्षण, सरसफाइ तथा सामाजिक उत्तरदायित्वसँग सम्बन्धित अभियानलाई निरन्तरता दिँदै समुदायमा हरित वातावरण निर्माणका लागि सक्रिय रहने जनाएको छ।
