विराटनगर । फिफा विश्वकप २०२६ को विजेता टोलीले यसपटक ट्रफी र स्वर्ण पदकसँगै पहिलोपटक विशेष ‘च्याम्पियनसिप रिङ’ पनि प्राप्त गर्ने भएको छ।
फिफाले २,०२६ वटा सीमित संस्करणका रिङ तयार गर्ने जनाएको छ। तीमध्ये ३० वटा विजेता टोलीका खेलाडी र टोलीका सदस्यलाई प्रदान गरिनेछन् भने बाँकी आधिकारिक रूपमा समर्थकका लागि बिक्री गरिनेछ।
प्रत्येक रिङमा विश्वकप ट्रफी र विजेता राष्ट्रको विशेष डिजाइन रहनेछ। साथै, छुट्टै क्रम संख्या, खेलाडीको औँलाअनुसारको आकार र प्रामाणिकताको प्रमाणपत्र पनि दिइनेछ।
फाइनलपछि कप्तान र मुख्य प्रशिक्षकलाई अस्थायी रिङ प्रदान गरिनेछ भने व्यक्तिगत रूपमा तयार गरिएका रिङ पछि विशेष समारोहमार्फत हस्तान्तरण गरिने फिफाले जनाएको छ।
