विराटनगर । अमेरिकी राष्ट्रपति डोनाल्ड ट्रम्पले चीनले अमेरिकी निर्वाचनसम्बन्धी डाटामा व्यापक साइबर घुसपैठ गरेको दाबी गर्दै अमेरिकी निर्वाचन पूर्वाधार लामो समयदेखि साइबर आक्रमणको उच्च जोखिममा रहेको बताएका छन्।
ह्वाइट हाउसले सामाजिक सञ्जालमार्फत सार्वजनिक गरेको वक्तव्यअनुसार, सन् २०२० को अमेरिकी राष्ट्रपतीय निर्वाचनको अवधिदेखि चीनले अमेरिकी निर्वाचनसम्बन्धी डाटामा अहिलेसम्मकै ठूलो साइबर घुसपैठ गरेको आरोप लगाइएको छ।
उक्त साइबर आक्रमणमार्फत करिब २२ करोड ९२ लाख अमेरिकी मतदाताको व्यक्तिगत विवरण गैरकानुनी रूपमा प्राप्त गरिएको दाबी गरिएको छ।
उनले अमेरिकी नागरिकलाई वर्षौंदेखि निर्वाचन पूर्वाधारको सुरक्षाबारे गलत जानकारी दिइएको आरोप लगाउँदै इलेक्ट्रोनिक मतदान मेसिन र मतगणना प्रणाली पर्याप्त रूपमा सुरक्षित नरहेको बताएका छन्।
