विराटनगर । विशेष अदालतले नेपाल टेलिकमका पूर्वप्रबन्ध निर्देशक सुनिल पौडेललाई घुस लिएको आरोपमा आठ वर्ष कैद सजाय सुनाएको छ।
विशेष अदालतका अध्यक्ष सुदर्शनदेव भट्ट तथा सदस्यहरू हेमन्त रावल र डिल्लीरत्न श्रेष्ठको इजलासले व्यवसायी दीपक आनन्दसँग घुस मागेको आरोपमा पौडेललाई दोषी ठहर गर्दै कैद सजाय तोकेको हो।
घुस दिएको आरोप लागेका व्यवसायी दीपक आनन्दलाई पनि विशेष अदालतले आठ वर्षकै कैद सजाय सुनाएको छ।
अदालतले रकम प्रत्यक्ष रूपमा बरामद नभएको आधारमा उनीहरूमाथि बिगो कायम नगरे पनि घुस लिएको भनिएको ३ करोड ८ लाख रुपैयाँलाई दामासाहीमा बाँडेर दुवै जनालाई १ करोड ५४ लाख रुपैयाँका दरले जरिवाना गर्ने फैसला गरेको छ।
