काठमाडौं। मिटरब्याज तथा ठगीबाट पीडित बनेकाहरूका समस्या सुन्न गृहमन्त्री सुधन गुरुङ मंगलबार बिहान सिमरा पुगेका छन्। गृहमन्त्री आफैं भेट्न आउने जानकारी पाएपछि न्यायको माग गर्दै जनकपुरबाट काठमाडौंतर्फ पैदल यात्रा गरिरहेका पीडितहरूले बाराको निजगढमै आफ्नो मार्च रोकेका छन्।
सोमबार राति निजगढस्थित उद्योग वाणिज्य संघको सभाहलमा विश्राम गरेका पीडितहरू मंगलबार बिहान पुनः यात्रा सुरु गर्ने तयारीमा थिए। तर स्थानीय प्रहरीले गृहमन्त्री उनीहरूलाई भेट्न आउन लागेको जानकारी दिएपछि उनीहरू निजगढमै पर्खिरहेका छन्।
मिटरब्याज र ठगीविरुद्ध न्यायको माग गर्दै असार २५ गते जनकपुरधामबाट सुरु भएको पीडितहरूको मार्च सोमबार साँझ बाराको निजगढ पुगेको थियो।
पीडितहरूले आफूहरूमाथि भएको अन्यायको निष्पक्ष छानबिन, दोषीमाथि कारबाही तथा पीडितलाई न्याय दिलाउन सरकारसँग माग गर्दै आएका छन्। गृहमन्त्रीसँगको भेटपछि आन्दोलनको आगामी कार्यक्रमबारे निर्णय गरिने जनाइएको छ।
