काठमाडौं। परराष्ट्र मन्त्रालय अन्तर्गतको राहदानी विभागले नयाँ राहदानी उत्पादन तथा व्यवस्थापन प्रणाली सञ्चालनमा ल्याएको छ। विभागले नेपाली इतिहासकै सबैभन्दा ठूलो डेटा माइग्रेसन सफलतापूर्वक सम्पन्न गर्दै सोमबारदेखि नयाँ प्रणालीमार्फत औपचारिक रूपमा राहदानी सेवा सुरु गरेको जनाएको छ।
विभागका अनुसार करिब एक करोड नेपाली नागरिकको राहदानीसम्बन्धी व्यक्तिगत विवरण अत्यन्त सुरक्षित रूपमा नयाँ प्रणालीमा स्थानान्तरण (माइग्रेसन) गरिएको छ। यति ठूलो परिमाणमा डेटा माइग्रेसन गरिएको यो नेपालकै पहिलो र सबैभन्दा ठूलो प्राविधिक कार्य भएको विभागको दाबी छ।
नयाँ सूचना प्रविधि प्रणाली कार्यान्वयनको प्रारम्भिक चरणमा केही प्राविधिक चुनौती देखिन सक्ने विभागले जनाएको छ। प्रणालीमा सामान्य सुस्तता आउनुका साथै राहदानी वितरणमा केही ढिलाइ हुन सक्ने भएकाले सेवाग्राहीलाई धैर्यता अपनाउन आग्रह गरिएको छ।
सम्भावित प्राविधिक समस्याको तत्काल समाधानका लागि विभागका कर्मचारी, प्राविधिक टोली तथा प्रणाली विकास गर्ने कम्पनीका विशेषज्ञहरू चौबिसै घण्टा तयारी अवस्थामा रहेको विभागले जनाएको छ। प्रणालीको निरन्तर अनुगमन, परीक्षण र सुधारको काम भइरहेको उल्लेख गर्दै विभागले सेवा थप प्रभावकारी बनाउने प्रतिबद्धता व्यक्त गरेको छ।
