विराटनगर- मोरङको केराबारी गाउँपालिका-५ बगैचा टोलकी ८७ वर्षीया धनमाया लिम्बू आफ्नै घरभित्र मृत अवस्थामा फेला परेकी छन्।
प्रहरीका अनुसार धनमाया २०८३ असार २७ गते बेलुका खाना खाएर आफ्नै कोठामा सुतेकी थिइन्। त्यसपछि आइतबार दिउँसो करिब १:३० बजेसम्म पनि बाहिर नदेखिएपछि स्थानीयवासीले शंका गर्दै घरको ढोका खोलेर हेर्दा उनी खाटमा सुतेकै अवस्थामा मृत फेला परेकी हुन्।
घटनाको जानकारी प्राप्त हुनासाथ इलाका प्रहरी कार्यालय केराबारीबाट प्रहरी नायब निरीक्षक भुवन श्रेष्ठको नेतृत्वमा प्रहरी टोली पुगेर घटनास्थल सुरक्षित राखेको थियो। थप अनुसन्धान तथा कानूनी प्रक्रिया पूरा गर्न इलाका प्रहरी कार्यालय बेलबारीबाट प्रहरी निरीक्षक राजीव गिरीको नेतृत्वमा पाँच सदस्यीय प्रहरी टोली घटनास्थलमा खटिएको थियो।
प्रहरीले आवश्यक कानूनी प्रक्रिया पूरा गरेपछि आइतबार दिउँसो करिब २:५० बजे शव पोस्टमार्टमका लागि बीपी कोइराला स्वास्थ्य विज्ञान प्रतिष्ठान, धरान पठाएको छ।
घटनाबारे थप अनुसन्धान भइरहेको प्रहरीले जनाएको छ।
