काठमाडौं । राहदानी विभाग अगाडि आत्मदाह प्रयासपछि उपचारका क्रममा ज्यान गुमाएका मुगुका २५ वर्षीय गणेश नेपालीको मृत्यु प्रकरणमा सरकार, काठमाडौं महानगरपालिका र पीडित पक्षबीच ९ बुँदे सहमति भएको छ।
आइतबार काठमाडौंका प्रमुख जिल्ला अधिकारी ईश्वरराज पौडेलको उपस्थितिमा जिल्ला प्रशासन कार्यालयमा भएको वार्तापछि सहमतिपत्रमा हस्ताक्षर गरिएको हो। सहमतिसँगै तीन दिनदेखि त्रिवि शिक्षण अस्पताल, महाराजगञ्जमा रोकिएको गणेश नेपालीको शवको पोस्टमार्टम तथा बुझ्ने प्रक्रिया अघि बढाइने भएको छ।
सहमतिअनुसार घटनाको निष्पक्ष छानबिनका लागि नेपाल सरकारले पूर्वन्यायाधीशको संयोजकत्वमा स्वतन्त्र छानबिन समिति गठन गर्नेछ। समितिले गठन भएको सात दिनभित्र प्रतिवेदन सरकारलाई बुझाउनेछ।
यस्तै, गणेश नेपालीलाई सहिद घोषणा गर्ने विषय कानुन, विगतको अभ्यास तथा छानबिन समितिको सिफारिसका आधारमा अघि बढाइने भएको छ। घटनाको दिन अग्रभागमा खटिएका काठमाडौं महानगरपालिकाका नगर प्रहरी कर्मचारीलाई छानबिन प्रतिवेदन नआउन्जेल निलम्बन गर्न जिल्ला प्रशासन कार्यालयले महानगरलाई पत्राचार गर्ने सहमति भएको छ।
सहमतिअनुसार काठमाडौं महानगरपालिकाले मृतककी श्रीमती एकमाया नेपालीलाई योग्यता र क्षमताका आधारमा रोजगारी उपलब्ध गराउने, छोरीको उच्च शिक्षासम्मको सम्पूर्ण खर्च व्यहोर्ने तथा आश्रित परिवारलाई राहत रकम उपलब्ध गराउनेछ। साथै काठमाडौंमा हुने काजक्रिया र अन्तिम संस्कारको सम्पूर्ण खर्च पनि महानगरले नै व्यहोर्नेछ।
मृतकका एकाघरका परिवारको स्वास्थ्य बिमाको व्यवस्था स्वास्थ्य तथा खाद्य स्वच्छता मन्त्रालयमार्फत मिलाइने सहमति पनि भएको छ।
मुगुको सोरु गाउँपालिका–१ जवलधारा घर भएका गणेश नेपालीले असार २५ गते काठमाडौंको त्रिपुरेश्वरस्थित राहदानी विभाग अगाडि नगर प्रहरीसँगको पार्किङ विवाद र ‘ह्वील लक’ सम्बन्धी घटनापछि शरीरमा पेट्रोल खन्याएर आत्मदाह प्रयास गरेका थिए। गम्भीर घाइते भएका उनको असार २६ गते वीर अस्पतालको बर्न युनिटमा उपचारका क्रममा निधन भएको थियो।
