काठमाडौं। भक्तपुरको खरिपाटीस्थित सुकुम्बासीहरू राखिएको होल्डिङ सेन्टरमा रिपोर्टिङका लागि पुगेका सञ्चारकर्मीलाई प्रवेशमा रोक लगाइएको छ।
रिपोर्टिङ गर्न पुगेका सञ्चारकर्मीलाई ‘माथिबाट अनुमति ल्याउनुस्’ भन्दै होल्डिङ सेन्टरभित्र प्रवेश गर्न नदिइएको हो। त्यहाँ खटिएका सुरक्षाकर्मीले गृह मन्त्रालय वा जिल्ला प्रशासन कार्यालय (सीडीओ) को अनुमति लिएपछि मात्रै प्रवेश गर्न मिल्ने जानकारी दिएका छन्।
यसअघि शनिबार गृहमन्त्री सुधन गुरुङ सहितको सरकारी टोलीले उक्त होल्डिङ सेन्टरको निरीक्षण गरेको थियो।
काठमाडौंको कीर्तिपुरस्थित राधास्वामी होल्डिङ सेन्टर बाढी–डुबानमा परेपछि त्यहाँ रहेका सुकुम्बासीहरूलाई अस्थायी रूपमा खरिपाटीस्थित होल्डिङ सेन्टरमा सारिएको हो। उनीहरूको अवस्था बुझ्न र समाचार सङ्कलन गर्न पुगेका सञ्चारकर्मीलाई भने प्रवेशमा रोक लगाएपछि सूचना प्रवाह र प्रेस स्वतन्त्रतामाथि प्रश्न उठेको छ।
