काठमाडौं – काठमाडौंको त्रिपुरेश्वरस्थित राहदानी विभाग अगाडि आत्मदाहको प्रयास गरेका मुगुको सोरु गाउँपालिका–१ का २५ वर्षीय गणेश नेपालीको स्वास्थ्य अवस्था अत्यन्तै गम्भीर रहेको वीर अस्पतालले जनाएको छ।
शुक्रबार आयोजित पत्रकार सम्मेलनमा अस्पतालका चिकित्सकहरूले नेपालीको अवस्था अझै अस्थिर रहेको र जुनसुकै बेला स्वास्थ्य अवस्था थप जटिल हुन सक्ने बताए। अनुहार र श्वासप्रश्वास प्रणालीमा गम्भीर असर परेकाले उपचार चुनौतीपूर्ण बनेको उनीहरूको भनाइ छ।
हाल गणेश नेपाली वीर अस्पतालको बर्न आईसीयूमा भेन्टिलेटरको सहायतामा उपचाररत छन्। अस्पतालका अनुसार उनको शरीरको करिब ५५ प्रतिशत भाग जलेको छ।
उनको उपचारका लागि प्लास्टिक सर्जरी विभागका संयोजक डा. पियुष दाहालको नेतृत्वमा युनिट प्रमुख डा. अपार लामिछाने, क्रिटिकल केयर विशेषज्ञ डा. निर्माण ज्ञवाली, एनेस्थेटिस्ट जयप्रकाश ठाकुर, प्रा. डा. रविराम श्रेष्ठ तथा नर्सिङ सेवाका स्वास्थ्यकर्मीसहित २१ सदस्यीय विशेष चिकित्सक टोली परिचालन गरिएको अस्पतालले जनाएको छ।
अस्पतालका अनुसार थप उपचारका लागि उनलाई भारतको नयाँ दिल्ली लैजाने तयारी गरिएको भए पनि स्वास्थ्य अवस्था स्थिर नभएकाले तत्काल स्थानान्तरण गर्न सम्भव भएको छैन।
गणेश नेपालीले बिहीबार त्रिपुरेश्वरस्थित राहदानी विभाग अगाडि पेट्रोल छर्केर आत्मदाहको प्रयास गरेका थिए। घटनापछि प्रहरीले र स्थानीयले उनको उद्धार गरी तत्काल वीर अस्पतालमा भर्ना गरेका थिए, जहाँ उनको सघन उपचार जारी छ।
