विराटनगर- नेपाल रेडक्रस सोसाइटी जिल्ला शाखा मोरङका सभापति सुकदेवप्रसाद मण्डलले सरकारले कोशी अस्पताल परिसरमा रहेको रेडक्रसको संरचना जबरजस्ती खाली गराए टेन्ट टाँगेर वा सडकमै भए पनि रक्तसञ्चार सेवा सञ्चालन गर्न तयार रहेको बताएका छन्।
नेपाल पत्रकार महासंघ जिल्ला शाखा मोरङको भवनमा बिहीबार आयोजित पत्रकार सम्मेलनमा बोल्दै सभापति मण्डलले संरचना खाली गराइए पनि मानवीय सेवा रोक्न नसकिने र जस्तोसुकै प्रतिकूल परिस्थितिमा पनि आफूहरूले सेवालाई निरन्तरता दिने बताएका हुन्।
सभापति मण्डलले कोशी अस्पतालले आफ्नो दाबी गरेको देवकोटा चोकस्थित जग्गा रेडक्रसकै भएको प्रमाण आफूहरूसँग रहेको दाबी गरे। उनले मालपोत कार्यालय र नापी कार्यालयका अभिलेखमा समेत उक्त भवन तथा जग्गा रेडक्रसको नाममा रहेको उल्लेख गरे।
उनका अनुसार कोशी अस्पतालको आग्रहमा वि.सं. २०२८ सालमा तत्कालीन रेडक्रस सभापति तथा पूर्वप्रधानमन्त्री स्वर्गीय मातृकाप्रसाद कोइरालाले अस्पतालकै एक सानो कोठाबाट रक्तसञ्चार सेवाको सुरुआत गरेका थिए। पछि अस्पताल व्यवस्थापन समितिको निर्णय र सरकारको स्वीकृतिपछि समाजसेवी स्व. चाँदमल राठीको सहयोगमा भवन निर्माण गरी रक्तसञ्चार सेवा सञ्चालन गरिएको थियो।
रेडक्रसले जारी गरेको प्रेस विज्ञप्तिमा रगतको कुनै कृत्रिम विकल्प नभएको उल्लेख गर्दै दुर्घटना, प्रसूति, जटिल शल्यक्रिया, क्यान्सर, थालासेमिया, रक्तअल्पतालगायतका बिरामीका लागि समयमै रगत उपलब्ध हुनु जीवन र मृत्युबीचको फरक बन्न सक्ने बताइएको छ।
विज्ञप्तिमा अस्पतालकै अनुरोध तथा निर्णयका आधारमा अस्पताल नजिकै रक्तसञ्चार सेवा सञ्चालन भइरहेको र हाल दैनिक १०० भन्दा बढी बिरामीले सेवा लिइरहेको जनाइएको छ। रेडक्रसका अनुसार हालसम्म लाखौँ बिरामीले गुणस्तरीय र सुरक्षित रक्तसेवा प्राप्त गरिसकेका छन्।
कोशी अस्पतालले २०८३ असार ५ गते १५ दिने र असार २२ गते ७ दिने सूचना जारी गर्दै हाल सञ्चालन भइरहेको प्रादेशिक रक्तसञ्चार सेवा केन्द्र हटाउन तथा खाली गर्न निर्देशन दिएको छ।
यदि उक्त केन्द्रबाट सेवा बन्द भएमा दीर्घरोगी तथा आकस्मिक अवस्थाका बिरामीलाई आवश्यक पर्ने रगत उपलब्ध गराउन कठिन हुने र मानवीय सेवा प्रभावित हुने चेतावनी रेडक्रसले दिएको छ।
सभापति मण्डलले भने, ‘रक्तसञ्चार जस्तो संवेदनशील सेवा कुनै हालतमा बन्द हुँदैन। सरकारले जबरजस्ती हटाए पनि हामी टेन्ट टाँगेर वा सडकमै बसेर सेवा दिन्छौँ।’
रेडक्रसले आफू गैरनाफामूलक तथा सेवामुखी संस्था भएकाले सरकार वा अन्य संघसंस्थाबाटआर्थिक सहयोग नपाउने जनाएको छ। रक्तसञ्चार सेवा केन्द्रमा रहेका केही सटर तथा कोठाबाट हुने आम्दानीबाट क्यान्सरका बिरामीलाई लागत सेवा शुल्कमा ५० प्रतिशत छुट, रक्तदातालाई रिफ्रेसमेन्ट, उपकरण तथा भवनको बीमा र जनचेतनामूलक कार्यक्रम सञ्चालन गर्दै आएको जानकारी दिइएको छ।
रेडक्रसले देवकोटा चोकस्थित केन्द्रबाटै निरन्तर सेवा सञ्चालन गर्न दिन जिल्ला तथा नगरवासी, नागरिक समाज, सञ्चारकर्मी र सम्बन्धित सरोकारवालासँग अपिल गरेको छ। साथै आगामी दिनमा सेवा थप गुणस्तरीय, आधुनिक, पारदर्शी र प्रभावकारी बनाउने प्रतिबद्धता पनि जनाएको छ।
कोशी अस्पताल र रेडक्रसबीच जग्गाको स्वामित्वको विवाद चर्किँदै जाँदा प्रादेशिक रक्तसञ्चार सेवा केन्द्रको भविष्यबारे अन्योल बढेको छ।
