विराटनगर । ऊर्जा, जलस्रोत तथा सिँचाइ मन्त्रालयले सरकार गठनपछिको पहिलो १०० दिनमा ऊर्जा उत्पादन, विद्युत प्रसारण, निर्यात, डिजिटल सेवा र सिँचाइ पूर्वाधार विस्तारमा उल्लेखनीय प्रगति हासिल गरेको जनाएको छ।
यस अवधिमा १३८ मेगावाट विद्युत थपिएसँगै देशको कुल जडित क्षमता ४,२४२ मेगावाट पुगेको छ भने ४७२.४३२ गिगावाट घण्टा विद्युत निर्यात गरिएको छ। ऊर्जा क्षेत्रबाट ७४ करोड ५२ लाख रुपैयाँ रोयल्टी संकलन भएको मन्त्रालयले जनाएको छ।
प्रसारण पूर्वाधारतर्फ ७९ सर्किट किलोमिटर लाइन थपिएको छ भने ढल्केबर–बालगंगा, लालबन्दी–सलिमपुर, बाह्रबिसे–लप्सीफेदी र मार्कीचोक–भरतपुर प्रसारण लाइन निर्माण सम्पन्न भएका छन्। साथै नयाँ प्रसारण लाइन र सबस्टेसन निर्माण प्रक्रिया अघि बढाइएको छ।
सेवा प्रवाहलाई प्रविधिमैत्री बनाउन नेपाल विद्युत प्राधिकरणले ‘एआई साथी’ च्याटबोट र ‘नो लाइट साथी’ प्रणाली सञ्चालनमा ल्याएको छ। साथै नयाँ मिटर, ट्रान्सफर्मर व्यवस्थापन र समयसीमामा आधारित सेवा प्रणाली लागू गरिएको छ।
हरित ऊर्जा प्रवर्द्धनअन्तर्गत ग्रीन हाइड्रोजन अध्ययन अन्तिम चरणमा पुगेको छ भने सौर्य, लघु जलविद्युत, विद्युतीय चुलो, बायोग्यास र सौर्य सिँचाइ पम्प विस्तार गरिएको छ। सिँचाइतर्फ थप २,९४८ हेक्टरमा सुविधा विस्तार, ३७.५ किलोमिटर तटबन्ध निर्माण तथा ७४ वटा नयाँ डिप ट्युबवेल जडानको काम अघि बढाइएको छ।
मन्त्रालयका अनुसार १०० दिनमा प्राप्त १८,७९६ गुनासोमध्ये १८,३९८ गुनासो फर्छ्योट गरिएको छ। आगामी दिनमा ऊर्जा उत्पादन, विद्युत निर्यात, हरित ऊर्जा र सिँचाइ पूर्वाधार विस्तारलाई अझ तीव्रता दिने प्रतिबद्धता मन्त्रालयले जनाएको छ।
