विराटनगर। कृषकलाई आधुनिक कृषि प्रणालीतर्फ आकर्षित गर्ने तथा सिँचाइ व्यवस्थालाई सहज बनाउने उद्देश्यले बर्जु गाउँपालिका–१ वडा कार्यालयले ५० प्रतिशत अनुदानमा विद्युतीय पानी तान्ने मेसिन वितरण गरेको छ।
वडा कार्यालयले १४ वटा किसान समूहलाई उक्त मेसिन वितरण गरेको हो। प्रत्येक समूहमा तीन–तीन जना सदस्य आबद्ध रहेका छन्। कार्यक्रममार्फत कुल ४२ जना किसान प्रत्यक्ष रूपमा लाभान्वित हुनेछन्।
मेसिन वितरण कार्यक्रममा बर्जु गाउँपालिकाका अध्यक्ष जिबछ कुमार राय, गाउँपालिकाका प्रमुख प्रशासकीय अधिकृत सुधीर साफी, वडा नं. १ का अध्यक्ष दिल बहादुर गुरुङ, वडा सचिव मिलन खतिवडा, लेखा शाखा प्रमुख विप्लव घिमिरे ,विपद् व्यवस्थापन प्रमुख तथा अन्य जनप्रतिनिधि र स्थानीय कृषकहरूको उपस्थिति रहेको थियो।
वितरण कार्यक्रमलाई सम्बोधन गर्दै गाउँपालिका अध्यक्ष जिबछ कुमार रायले कृषिको आधुनिकीकरण र किसानको उत्पादन लागत घटाउन गाउँपालिकाले अनुदानमुखी कार्यक्रमलाई निरन्तरता दिएको बताए। उनले यस्ता कार्यक्रमले उत्पादन वृद्धि र किसानलाई आत्मनिर्भर बनाउन महत्वपूर्ण योगदान पुग्ने विश्वास व्यक्त गरे।
वडा अध्यक्ष दिल बहादुर गुरुङले किसानलाई सिँचाइमा सहजता प्रदान गर्दै उत्पादन वृद्धि गर्ने उद्देश्यले ५० प्रतिशत अनुदानमा विद्युतीय पानी तान्ने मेसिन वितरण गरिएको बताए। आगामी दिनमा पनि किसानको आवश्यकता अनुसार कृषि प्रवर्द्धनका कार्यक्रम सञ्चालन गरिने उनको भनाइ थियो।
