मोरङ । मोरङको रतुवामाई नगरपालिकाले नगरभित्र रहेका सडकबत्तीको मर्मत–सम्भार अब सम्बन्धित वडा कार्यालयबाटै गर्ने व्यवस्था लागू गरेको छ। सेवा प्रवाहलाई छिटो, प्रभावकारी र सहज बनाउने उद्देश्यले चालु आर्थिक वर्षदेखि यो व्यवस्था कार्यान्वयनमा ल्याइएको हो।
नगरपालिकाका प्रमुख प्रशासकीय अधिकृत डमरु बल्लभ बरालका अनुसार नगरपालिकाका सबै १० वटै वडाले आफ्नै बजेटबाट सडकबत्ती मर्मत गर्ने जिम्मेवारी पाएका छन्। यसअघि सडकबत्ती बिग्रिएपछि मर्मत हुन दुईदेखि तीन महिनासम्म लाग्ने र त्यसका कारण स्थानीयवासीबाट निरन्तर गुनासो आउने गरेको उनले बताए।
उनले अब वडास्तरबाटै मर्मतको व्यवस्था गरिएकाले सडकबत्ती बिग्रिएपछि छिटो मर्मत हुने, नागरिकले सहज सेवा पाउने र नगरको सडक प्रकाश व्यवस्थापन थप प्रभावकारी बन्ने विश्वास व्यक्त गरे।
नगरपालिकाले विकेन्द्रीकृत सेवा प्रवाहलाई प्राथमिकता दिँदै स्थानीयस्तरमै समस्या समाधान गर्ने उद्देश्यअनुसार यो व्यवस्था लागू गरेको जनाएको छ।
