काठमाडौं । सरकारले शिक्षा नियमावली (दशौँ संशोधन) स्वीकृत गर्दै तीन वर्ष सेवा अवधि पूरा गरेका स्थायी शिक्षकलाई एक सामुदायिक विद्यालयबाट अर्को सामुदायिक विद्यालयमा सरुवा गर्न सकिने व्यवस्था गरेको छ।
बिहीबार स्वीकृत भएको संशोधित नियमावलीअनुसार स्थायी सेवा अवधि तीन वर्ष पूरा गरेका शिक्षकको सरुवा गर्न सकिने उल्लेख गरिएको छ।
यद्यपि, अपाङ्गता भएका शिक्षक, अरूको सहायतामा हिँडडुल गर्नुपर्ने अशक्त, गर्भवती महिला तथा दुई वर्षभन्दा कम उमेरका बच्चा भएका महिला शिक्षकका हकमा भने यो व्यवस्था लागू नहुने नियमावलीमा उल्लेख गरिएको छ।
सरकारले शिक्षक व्यवस्थापनलाई थप व्यवस्थित, प्रभावकारी र आवश्यकताअनुसार जनशक्ति परिचालन गर्ने उद्देश्यले सरुवा सम्बन्धी नयाँ व्यवस्था लागू गरेको जनाएको छ।
