विराटनगर । मोरङ प्रहरीले ब्राउन सुगरसहित दुई जनालाई पक्राउ गरेको छ।
जिल्ला प्रहरी कार्यालय मोरङका अनुसार बुधबार साँझ करिब ५ः५० बजे पथरी शनिश्चरे नगरपालिका–१०, मंगलबारेस्थित एक घरमा लागूऔषध कारोबार भइरहेको भन्ने गोप्य सूचनाका आधारमा इलाका प्रहरी कार्यालय पथरी र कोशी प्रदेश प्रहरी कार्यालय विराटनगरबाट खटिएको संयुक्त टोलीले छापा मारेको थियो।
प्रहरीले ३३ वर्षीय मोतीराज लिम्बूको घरमा खानतलासी गर्दा कोठाबाट १९६ ग्राम ४०० मिलिग्राम ब्राउन सुगर बरामद गरेको जनाएको छ।
घटनामा संलग्न रहेको आरोपमा पथरी शनिश्चरे–१० निवासी ३३ वर्षीय मोतीराज लिम्बू र रंगेली नगरपालिका–६ निवासी ३३ वर्षीय मिथुन शाहलाई पक्राउ गरिएको प्रहरीले जनाएको छ।
दुवै जनालाई इलाका प्रहरी कार्यालय पथरीमा राखी लागूऔषध सम्बन्धी कसुरमा थप अनुसन्धान भइरहेको जिल्ला प्रहरी कार्यालय मोरङले जनाएको छ।
