रतुवामाई । मोरङको रतुवामाई नगरपालिका–७ सिजुवामा लागुऔषध दुर्व्यसन न्यूनीकरण तथा युवा पुस्तामा सचेतना अभिवृद्धि गर्ने उद्देश्यले लागुऔषध विरुद्ध महाअभियान सम्पन्न गरिएको छ । इलाका प्रहरी कार्यालय सिजुवाको आयोजनामा भएको कार्यक्रममा स्थानीय सरकार, सुरक्षा निकाय, जनप्रतिनिधि, विद्यार्थी तथा स्थानीयवासीको उल्लेखनीय सहभागिता रहेको थियो ।
कार्यक्रमको मुख्य आकर्षणका रूपमा सरस्वती माध्यमिक विद्यालय, इटहराका विद्यार्थीहरूले प्रस्तुत गरेको सडक नाटक रहेको थियो । नाटकमार्फत लागुऔषध दुर्व्यसनले व्यक्ति, परिवार र समाजमा पार्ने नकारात्मक असरलाई जीवन्त रूपमा प्रस्तुत गरिएको थियो ।
कार्यक्रममा सहजीकरण गर्दै इलाका प्रहरी कार्यालय सिजुवाका प्रहरी निरीक्षक कैलाश लिम्बूले लागुऔषध नियन्त्रण केवल प्रहरीको जिम्मेवारी नभई परिवार, विद्यालय, स्थानीय सरकार, सञ्चारमाध्यम र सम्पूर्ण समुदायको साझा दायित्व भएको बताए । उनले अपराध भएपछि कारबाही गर्नु मात्र समाधान नभई अपराध हुन नदिन समयमै सचेतना फैलाउनु आवश्यक रहेको उल्लेख गरे ।
सहायक प्रमुख जिल्ला अधिकारी सरोज कोइरालाले लागुऔषध नियन्त्रण प्रहरीको मात्र दायित्व नभई राज्य, स्थानीय तह, विद्यालय, अभिभावक र समुदायको साझा जिम्मेवारी भएको बताए । युवालाई सही बाटोमा डोर्याउन सबै पक्षबीच समन्वय र सहकार्य आवश्यक रहेको उनको भनाइ थियो ।
रतुवामाई नगरपालिकाका प्रमुख नागेश्वरप्रसाद सिंह गनगाईले नगरपालिकाले लागुऔषध दुर्व्यसन न्यूनीकरणलाई प्राथमिकतामा राख्दै विद्यालय र समुदायमा सचेतनामूलक कार्यक्रमलाई निरन्तरता दिने बताए । स्वस्थ, सुरक्षित र लागुऔषधमुक्त रतुवामाई निर्माणका लागि सबै नागरिकको साथ आवश्यक रहेको उनले उल्लेख गरे ।
उपप्रमुख दमयन्तादेवी चुँडालले किशोर–किशोरी र युवालाई लागुऔषधको जोखिमबाट जोगाउन परिवार, विद्यालय र स्थानीय सरकारबीच बलियो समन्वय आवश्यक रहेको बताइन् । सचेतना नै लागुऔषध नियन्त्रणको सबैभन्दा प्रभावकारी माध्यम भएको उनको भनाइ थियो।
मोरङका प्रहरी प्रमुख (एसपी) कवित कटुवालले लागुऔषधविरुद्ध प्रहरीले कानुनी कारबाहीसँगै सचेतनामूलक अभियानलाई पनि प्राथमिकता दिएको बताए । उनले लागुऔषधको अवैध कारोबार र प्रयोगमा संलग्न जो–कोहीलाई कानुनी दायरामा ल्याइने स्पष्ट पार्दै, नागरिकलाई सूचना र सहयोगमार्फत प्रहरीसँग सहकार्य गर्न आग्रह गरे ।
कार्यक्रममा जनप्रतिनिधि, विभिन्न सरोकारवाला निकायका प्रतिनिधि, शिक्षक, विद्यार्थी तथा स्थानीय नागरिकको उपस्थिति रहेको थियो ।
