काठमाडौं – नेकपा एमालेका नेता तथा पूर्वसञ्चारमन्त्री गोकुल बाँस्कोटाले पछिल्लो समय चलिरहेको कम्युनिस्ट दलहरूबीचको एकता र सहकार्यको प्रयासमाथि तीखो टिप्पणी गरेका छन्। सामाजिक सञ्जालमार्फत धारणा सार्वजनिक गर्दै उनले यस्तो प्रयासलाई “पटक–पटक फुटेको हाँडी फेरि जोड्ने लालसायुक्त राग” को संज्ञा दिएका छन्।
कम्युनिस्ट शक्तिहरूलाई पुनः एकताबद्ध गर्ने बहस तीव्र भइरहेका बेला बाँस्कोटाले नेतृत्व तहकै भूमिकामाथि प्रश्न उठाएका हुन्। उनका अनुसार राजनीतिक संकट र विभिन्न खतराको चित्र प्रस्तुत गर्दै कार्यकर्ता तथा जनतामाझ आकर्षक भाष्य निर्माण गर्ने प्रयास भइरहेको छ। तर यस्ता तर्कहरू वास्तविक रूपमा आफ्नै असफलता ढाकछोप गर्न र शक्ति–सत्ता जोगाउन प्रयोग गरिएका “भुत्ते हतियार” मात्र भएको उनको टिप्पणी छ।
बाँस्कोटाले कम्युनिस्ट आन्दोलनलाई बलियो बनाउने वास्तविक इच्छा भए नेतृत्वले सबैभन्दा पहिले विगतमा पार्टी विभाजन गर्नु गल्ती थियो भन्ने आत्मस्वीकार गर्नुपर्ने बताएका छन्। उनले नेतृत्वको नैतिकतामाथि समेत प्रश्न उठाउँदै भनेका छन्, “यदि साँच्चै सुधार चाहिएको हो भने नेतृत्वले आफू पद र शक्ति छोडेर नयाँ पुस्ता र सहकर्मीलाई अघि बढ्न दिने नैतिक साहस देखाउन सक्छ?”
उनको भनाइले अहिले कम्युनिस्ट वृत्तमा चलिरहेको एकताको प्रयास केवल शक्ति सन्तुलन र राजनीतिक समीकरणमा सीमित रहेको संकेत गरेको छ। बाँस्कोटाको टिप्पणीले नेतृत्वको आत्मसमीक्षा, जिम्मेवारीबोध र राजनीतिक संस्कारबारे नयाँ बहससमेत सुरु गराएको छ।
