काठमाडौं । कैलालीमा एकै दिन झण्डै साढे तीन किलो चरेससहित तीन जना पक्राउ परेका छन्। प्रहरीले अत्तरिया बजारका छुट्टाछुट्टै स्थानबाट उनीहरूलाई नियन्त्रणमा लिएको हो।प्रहरीका अनुसार अत्तरियास्थित ममता सेकुवा सेन्टरबाट आइतबार दिउँसो दुई किलो ९५ ग्राम चरेससहित दुई जनालाई पक्राउ गरिएको छ।
पक्राउ पर्नेमा ममता सेकुवा सेन्टरका सञ्चालक शंकरकुमार शाही र धनगढी उपमहानगरपालिका–१मा बसोबास गर्दै आएका कञ्चनपुरका मीनराज भट्ट रहेका छन्।
त्यसैगरी, अत्तरिया–धनगढी सडकखण्डबाट एक किलो २३६ ग्राम चरेससहित गोदावरी नगरपालिका–२का धर्म धामीलाई आइतबार राति पक्राउ गरिएको छ।
सुदूरपश्चिम प्रदेश प्रहरी कार्यालयको जनसम्पर्क तथा मिडिया समन्वय शाखाका अनुसार पक्राउ परेका तीनै जनामाथि थप अनुसन्धान भइरहेको छ।
प्रहरीका अनुसार पछिल्लो समय कैलालीसहित सुदूरपश्चिमका विभिन्न जिल्लाबाट लागूऔषधसहित पक्राउ पर्ने घटनामा वृद्धि हुँदै गएको छ।
