विराटनगर- जिल्ला कारागार मोरङका कैदीबन्दीलाई वितरण गरिएको भत्ता हिनामिना गरेको आरोपमा पक्राउ परेका नेपाली कांग्रेसका नेता अभिषेक गिरीको विषयलाई लिएर शनिबार मोरङ कारागारभित्र प्रदर्शन भएको छ।
कैदीबन्दीलाई वितरण गरिएको गर्मी भत्ताको रकम हिनामिना गरेको आरोपमा शनिबार बिहान पक्राउ परेका गिरीको पक्ष र विपक्षमा कैदीबन्दीहरूले छुट्टाछुट्टै प्रदर्शन गरेका हुन्।
प्रहरीले गिरीलाई शनिबार बिहान विराटनगर महानगरपालिका-८ मधुमारास्थित निवासबाट पक्राउ गरेको थियो। त्यसको केही घण्टापछि कारागारभित्र रहेका कैदीबन्दीले प्रदर्शन गरेका हुन्।
जिल्ला कारागार मोरङका जेलर राजन घिमिरेका अनुसार बी ब्लकका कैदीबन्दीले गिरीको समर्थनमा र ए ब्लकका कैदीबन्दीले गिरीविरुद्ध प्रदर्शन गरेका छन्।
कारागारमा रहेका बी ब्लकका ५ सय ३६ जना कैदीबन्दीलाई वितरण गरिएको १३ लाख ४० हजार रुपैयाँबराबर गर्मी भत्ता हिनामिना गरेको आरोप गिरीमाथि लगाइएको छ। यही घटनाको अनुसन्धानका लागि उनलाई पक्राउ गरिएको प्रहरीले जनाएको छ।
मोरङ कारागारमा तीनवटा ब्लक छन्। यहाँ अहिले १ हजार १ सय ८५ जना कैदीबन्दी छन्। उनीहरूमध्ये ए ब्लकमा ५ सय ३९, बी ब्लकमा ५ सय ३६ र महिला ब्लकमा १ सय १० जना रहेका छन्। सबै कैदीबन्दीलाई सरकारले गर्मी भत्ताबापत प्रतिव्यक्ति २ हजार ५ सय रुपैयाँ उपलब्ध गराएको थियो।
जेल प्रशासनका अनुसार ए ब्लक र महिला ब्लकका कैदीबन्दीले भत्ता प्राप्त गरे पनि बी ब्लकका लागि छुट्याइएको १३ लाख ४० हजार रुपैयाँ वितरणको केही समयमै गायब भएको थियो। सोही घटनामा संलग्न रहेको आशंकामा गिरी पक्राउ परेका हुन्।
पक्राउ परेका गिरीले छाती दुखेको भनेपछि प्रहरीले उनलाई उपचारका लागि विराटनगरस्थित कोशी अस्पतालमा भर्ना गरेको छ।
