विराटनगर । फिलिपिन्स सरकारले लोकप्रिय भिडियो गेम गोरबक्सलाई अस्थायी रूपमा प्रतिबन्ध लगाएको छ।
हालै भएको विद्यालय गोलीकाण्डमा संलग्न एक किशोर उक्त खेलको नियमित खेलाडी रहेको प्रारम्भिक अनुसन्धानबाट खुलेपछि सरकारले यो कदम चालेको हो।
गत सोमबार ट्याक्लोबान सहरस्थित सान होजे राष्ट्रिय हाई स्कुलमा भएको गोलीकाण्डमा तीन विद्यार्थीको मृत्यु भएको थियो भने २० जना घाइते भएका थिए। घटनामा १४ र १५ वर्षका दुई किशोर संलग्न रहेको आरोप छ।
प्रहरीका अनुसार १४ वर्षीय एक आरोपी गोरबक्स खेलको नियमित प्रयोगकर्ता थिए। उक्त खेलमा विभिन्न हतियार, विस्फोटक सामग्री तथा हिंसात्मक दृश्यहरू समावेश छन्।
फिलिपिन्सको साइबर अपराध अनुसन्धान तथा समन्वय केन्द्रले घटनामा अनलाइन सामग्रीको सम्भावित प्रभावलाई बेवास्ता गर्न नसकिने भन्दै अनुसन्धान नसकिएसम्म गोरबक्समा अस्थायी रोक लगाइएको जनाएको छ।
