वडाध्यक्षमाथि हातपात गरेको आरोपमा पत्रकार ऐश्वर्या कुँवर पक्राउ

धनगढी । कञ्चनपुरमा सार्वजनिक कार्यक्रममा वडाध्यक्षमाथि हातपात तथा दुर्व्यवहार गरेको आरोपमा पत्रकार ऐश्वर्या कुँवर पक्राउ परेकी छन्। भीमदत्त नगरपालिका–१८ का वडाध्यक्ष रविन्द्र देवकोटा माथि महेन्द्रनगरस्थित एक होटलमा आयोजित कार्यक्रममा पुगेर कुँवरले हातपात गरेको आरोप लागेको हो।

सामाजिक सञ्जालमा सार्वजनिक भएका भिडियोहरूमा भनाभनका क्रममा कुँवरले वडाध्यक्ष देवकोटामाथि मुक्का प्रहार गरेको देखिएको छ। घटनापछि वडा प्रहरी कार्यालयको टोलीले उनलाई घटनास्थलबाटै नियन्त्रणमा लिएको थियो।

जिल्ला प्रहरी कार्यालय कञ्चनपुरका प्रवक्ता तथा प्रहरी नायब उपरीक्षक (डीएसपी) टेकबहादुर रावत का अनुसार कुँवरलाई पक्राउ गरी जिल्ला प्रहरी कार्यालयको हिरासतमा राखिएको छ। वडाध्यक्ष देवकोटाले उनीविरुद्ध अभद्र व्यवहार सम्बन्धी किटानी जाहेरी दिएपछि कानुनी प्रक्रिया अघि बढाइएको प्रहरीले जनाएको छ।

यता कुँवरले भने आफ्नो फेसबुकमार्फत भिडियो सार्वजनिक गर्दै वडाध्यक्ष देवकोटाले आफूमाथि दुर्व्यवहार गरेको आरोप लगाएकी छन्। उनी नेपाल पत्रकार महासंघ कञ्चनपुर शाखाकी सदस्य समेत हुन्। घटनाबारे थप अनुसन्धान भइरहेको प्रहरीले जनाएको छ।