विराटनगर । अमेरिकी राष्ट्रपति डोनाल्ड ट्रम्प र इटालीकी प्रधानमन्त्री जर्जिया मेलोनीबीचको सार्वजनिक विवाद थप चर्किएको छ।
ट्रम्पले जी–७ शिखर सम्मेलनका क्रममा मेलोनीले आफूसँग फोटो खिच्न आग्रह गरेको दाबी पुनः दोहोर्याएका छन् भने मेलोनीले उक्त आरोपलाई पूर्ण रूपमा असत्य र मनगढन्ते बताएकी छन्।
फ्रान्समा सम्पन्न जी–७ शिखर सम्मेलनपछि इटालीको टेलिभिजन च्यानल ला–७ सँगको अन्तर्वार्तामा ट्रम्पले मेलोनीले आफूसँग फोटो खिच्न निकै चाहेको र आफूले उनको आग्रह स्वीकार गरेको बताएका थिए।
पछिल्लो अभिव्यक्तिमा पनि उनले आफ्नो भनाइबाट पछि हट्न अस्वीकार गर्दै मेलोनी नै फोटो खिचाउन इच्छुक रहेको दाबी गरेका छन्।
यता मेलोनीले सामाजिक सञ्जाल एक्समार्फत सार्वजनिक भिडियो सन्देश जारी गर्दै ट्रम्पको दाबीको कडा खण्डन गरेकी छन्। उनले ट्रम्पका भनाइ पूर्ण रूपमा बनावटी रहेको बताउँदै अमेरिकाका राष्ट्रपतिले आफ्ना निकट सहयोगी राष्ट्रहरूसँग किन यस्तो व्यवहार गरिरहेका छन् भन्ने बुझ्न कठिन भएको प्रतिक्रिया दिएकी छन्।
विवादका बीच इटालीका विदेशमन्त्री एन्टोनियो ताजानीले अमेरिकाको तय भएको भ्रमण स्थगित गरेका छन्। उनी अमेरिकी विदेशमन्त्री मार्को रुबियोसँग भेटवार्ताका लागि अमेरिका जाने कार्यक्रम थियो। ताजानीले ट्रम्पको अभिव्यक्तिलाई अपमानजनक भन्दै विरोधस्वरूप भ्रमण स्थगित गरिएको बताएका छन्।
पछिल्लो घटनाले अमेरिका र युरोपेली सहयोगी राष्ट्रहरूबीचको सम्बन्धमा पुनः तनाव थपिएको छ। जी–७ सम्मेलनपछि सम्बन्ध सुधार हुने संकेत देखिए पनि ट्रम्प र मेलोनीबीचको सार्वजनिक आरोप–प्रत्यारोपले त्यो प्रयासलाई कमजोर बनाएको विश्लेषण गरिएको छ।
पछिल्ला दिनहरूमा ट्रम्पले आफ्ना युरोपेली साझेदारहरूप्रति सार्वजनिक रूपमा आलोचनात्मक अभिव्यक्ति दिँदै आएका छन्।
