उदयपुर । उदयपुरको रौतामाई गाउँपालिका–७ मुर्कुची बजारमा अटोको ठक्करबाट घाइते भएकी एक वृद्धाको उपचारका क्रममा मृत्यु भएको छ।
मुर्कुची बजारबाट गाईघाटतर्फ आउँदै गरेको प्रदेश १–०५–००१ ह ०५४८ नम्बरको अटोले पैदलयात्री स्थानीय ७६ वर्षीया फुलमाया तामाङलाई ठक्कर दिँदा उनी गम्भीर घाइते भएकी थिइन्।
शनिबार बिहान ८ः३० बजे भएको उक्त दुर्घटनामा उनको टाउको र कम्मरमा चोट लागेको थियो। प्रारम्भिक उपचारका लागि उनलाई सिटी अस्पताल गाईघाट लगिएको थियो। उपचारपछि थप उपचारका लागि विराटनगरस्थित नोबेल अस्पताल रिफर गरिएको थियो।
उपचारकै क्रममा शनिबार साँझ ६ः१५ बजे चिकित्सकले उनको मृत्यु भएको घोषणा गरेको प्रहरीले जनाएको छ। मृतकको शव पोस्टमार्टमका लागि कोशी अस्पताल विराटनगर पठाइएको छ।
दुर्घटनापछि जिल्ला प्रहरी कार्यालय उदयपुरबाट प्रहरी सहायक निरीक्षक दुखी मालीको नेतृत्वमा खटिएको टोलीले अटो चालक रौतामाई गाउँपालिका–७ का २० वर्षीय गौरवबहादुर तामाङलाई नियन्त्रणमा लिएको छ। अटोसमेत प्रहरीले नियन्त्रणमा लिई थप अनुसन्धान अघि बढाएको जनाएको छ।
प्रहरीका अनुसार चालकले लापरबाहीपूर्वक ब्याक गर्ने क्रममा पैदलयात्रीलाई अटोले ठक्कर दिएको थियो।
