विराटनगर- काेशी प्रदेशका आन्तरिक मामिला तथा कानूनमन्त्री इन्द्रमणि पराजुलीको घरमा मध्यराति प्रहरी पुगेको घटनाले चर्चा पाइरहँदा प्रहरीले यस सम्बन्धमा आफ्नो औपचारिक धारणा सार्वजनिक गरेको छ।
सार्वजनिक वृत्तमा मन्त्री पराजुलीको घरमा मध्यराति प्रहरी पुगेको विषयलाई लिएर विभिन्न किसिमका टीकाटिप्पणी सुरु भएपछि जिल्ला प्रहरी कार्यालय मोरङले यसबारे आफ्नो ध्यानाकर्षण भएको जनाएको हो।
शुक्रबार एक विज्ञप्ति जारी गर्दै जिल्ला प्रहरी कार्यालय मोरङका सूचना अधिकारी डीएसपी मकेन्द्रकुमार मिश्रले पक्राउ पुर्जी जारी भइ फरार रहेका प्रतिवादी मन्त्री निवासमा लुकेको सूचनाका आधारमा खोजीका लागि प्रहरी टोली त्यहाँ पुगेको बताएका छन्। यद्यपि प्रहरीले मन्त्रीको निवासमा खानतलासी भने नगरेको विज्ञप्तिमा उल्लेख छ।
विराटनगर-३ स्थित मन्त्री पराजुलीको निवासमा बिहीबार राति करिब ११ बजे प्रहरी टोली पुगेको थियो। त्यसबेला मन्त्री भने निवासमा थिएनन्। उनले आफू सो समयमा संखुवासभामा रहेको बताएका छन्।
प्रहरीद्वारा जारी विज्ञप्तिमा उल्लेख व्यहोरा जस्ताको तस्तै-
कोशी प्रदेश सरकारका आन्तरिक मामिला तथा कानूनमन्त्री माननीय इन्द्रमणि पराजुलीज्यूको निवासमा प्रहरीको छापा शीर्षकमा विभिन्न सञ्चारमाध्यमहरूमा प्रकाशित सूचनाप्रति जिल्ला प्रहरी कार्यालय, मोरङको ध्यानाकर्षण भएको छ ।
सो सम्बन्धमा मिति २०८३ असार १ गते पक्राउ पुर्जी जारी भइ फरार रहेका प्रतिवादी जिल्ला मोरङ विराटनगर महानगरपालिकास्थित पुष्पलाल चोक आसपासको एरियामा लुकिछिपी रहेको विशेष सूचनाको आधारमा खोजतलास गर्ने क्रममा प्रहरी टोली उक्त एरियामा पुगेको र सोही एरियामा कोशी प्रदेश सरकारका आन्तरिक मामिला तथा कानूनमन्त्री माननीय इन्द्रमणि पराजुलीज्यूको निवाससमेत रहेकोमा माननीय मन्त्रीज्यूको निवासमा प्रहरीद्वारा खानतलासी नगरिएको/नभएको व्यहोरा सम्पूर्णमा जानकारीका लागि अनुरोध गरिएको छ।
