विराटनगर । अर्जेन्टिनी फुटबल स्टार लियोनेल मेसी अन्तर्राष्ट्रिय फुटबलमा सर्वाधिक ह्याट्रिक गर्ने खेलाडी बनेका छन्।
फुटबल तथ्याङ्कसम्बन्धी संस्था ट्रान्सफरमार्केटले सार्वजनिक गरेको पछिल्लो विवरणअनुसार मेसीले आफ्ना चिरपरिचित प्रतिद्वन्द्वी क्रिस्टियानो रोनाल्डोलाई पछि पार्दै यो कीर्तिमान कायम गरेका हुन्।
मेसीले २०० अन्तर्राष्ट्रिय खेलमा ११ ह्याट्रिक पूरा गरेका छन्। यता, पोर्चुगलका कप्तान क्रिस्टियानो रोनाल्डो २२८ खेलमा १० ह्याट्रिकसहित दोस्रो स्थानमा रहेका छन्।
सर्वाधिक अन्तर्राष्ट्रिय ह्याट्रिक गर्ने खेलाडीहरूको सूचीमा संयुक्त अरब इमिरेट्सका अली मबखौत १०५ खेलमा ९ ह्याट्रिकसहित तेस्रो स्थानमा छन्।
नर्वेका युवा स्ट्राइकर अर्लिङ हालान्डले ५१ खेलमै ६ ह्याट्रिक गर्दै चौथो स्थान ओगटेका छन्। खेल सङ्ख्याको तुलनामा हालान्डको प्रदर्शन निकै प्रभावशाली मानिएको छ।
हङकङका चान सिउ कीले ६१ खेलमा ६ ह्याट्रिक तथा पोल्याण्डका रोबर्ट लेवान्डोस्कीले १६७ खेलमा ६ ह्याट्रिक गर्दै क्रमशः पाँचौँ र छैटौँ स्थानमा रहेका छन्।
त्यस्तै, माल्दिभ्सका अली अश्फाकले ७० खेलमा ५ ह्याट्रिक र इङ्गल्याण्डका कप्तान ह्यारी केनले ११४ खेलमा ५ ह्याट्रिक गर्दै शीर्ष आठभित्र स्थान बनाएका छन्।
४-४ वटा अन्तर्राष्ट्रिय ह्याट्रिक गर्ने खेलाडीहरूको सूचीमा ताहितीका तेहाउ, चीनका याङ, फिजीका रोय कृष्णा, इजरायलका एरान जाहाभी, हैटीका डकन्स नाजोन, यूएईका अहमद खलिल तथा न्युजिल्याण्डका क्रिस वुड रहेका छन्।
