विराटनगर । जी–सेभेन शिखर सम्मेलनको विरोधमा स्विट्जरल्यान्डको जेनेभामा आइतबार विशाल प्रदर्शन भएको छ।
‘नो जी–सेभेन गठबन्धन’को नेतृत्वमा आयोजित प्रदर्शनमा सहभागीहरूले ‘जी–७ लाई अस्वीकार गरौँ’ लगायतका नारा लगाएका थिए।
सुरुआतमा शान्तिपूर्ण रहेको प्रदर्शन पछि केही स्थानमा तनाव उत्पन्न भएको थियो। यस क्रममा विस्फोटजस्ता आवाज सुनिनुका साथै एउटा टेस्ला कारमा आगजनी गरिएको बताइएको छ।
जेनेभा प्रहरीले प्रदर्शन क्षेत्रबाट चक्कु, बञ्चरो, ग्यास क्यानिस्टर र पटाकालगायत सामग्री बरामद गरेको जनाएको छ।
बुधबार फ्रान्सको एभियानमा हुने जी–७ शिखर सम्मेलनलाई लक्षित गर्दै स्विस अधिकारीहरूले करिब ४ हजार सैनिक परिचालन गरेका छन्।
यसअघि सन् २००३ मा जेनेभाबाट ५० किलोमिटरभन्दा कम दुरीमा रहेको फ्रान्सेली सहर एभियानमा पहिलो पटक जी–७ शिखर सम्मेलन आयोजना हुँदा जेनेभामा ठूला दङ्गाहरू भड्किएका थिए ।
