विराटनगर । सनातन सभ्यता, संस्कृति तथा धार्मिक सहिष्णुताको संरक्षण र प्रवर्द्धन गर्ने उद्देश्यले मोरङको विराटनगरमा आगामी असार ६ गते शनिबार ‘बृहत् सनातन सम्मेलन’ आयोजना हुने भएको छ।
आयोजकले सोमबार जारी गरेको प्रेस विज्ञप्तिअनुसार “सनातन संस्कृतिको शान, हिन्दु, बौद्ध, किराँतको साझा पहिचान” भन्ने मूल नारासहित सम्मेलन आयोजना गर्न लागिएको हो। सम्मेलनले नेपालमा सदियौँदेखि कायम धार्मिक सद्भाव, सहअस्तित्व र सहिष्णुताको परम्परालाई अझ सुदृढ बनाउने लक्ष्य लिएको जनाएको छ।
सम्मेलनमा नेपाल तथा भारतका चर्चित आध्यात्मिक व्यक्तित्वहरूको विशेष उपस्थिति रहने आयोजकले जनाएको छ। प्रमुख अतिथिका रूपमा भारतका स्वामी अवधेशनन्द गिरी महाराज सहभागी हुनेछन्। यस्तै अन्तर्राष्ट्रिय बौद्ध महासंघ, नेपाल च्याप्टरका अध्यक्ष श्रद्धेय फुन्छोक छेम्बे रिन्पोछे (थुप्तेन जिग्दोल) तथा किराँत धर्मका प्रमुख गुरु श्रद्धेय महिडुङ्मा अङ्सीमाङ आत्मानन्द लिङ्देन ‘महेन्द्र’को पनि सहभागिता रहने बताइएको छ।
आयोजकका अनुसार सम्मेलन असार ६ गते बिहान ११ः३० बजेदेखि विराटनगर महानगरपालिका–१ स्थित जिल्ला प्रहरी कार्यालय मोरङसँगैको मैदानमा सञ्चालन हुनेछ। कार्यक्रममा देशका विभिन्न प्रदेश, जिल्ला तथा स्थानीय तहबाट हजारौँ श्रद्धालु, धर्मप्रेमी र सर्वसाधारणको सहभागिता रहने अपेक्षा गरिएको छ।
यो सम्मेलन कुनै एक समुदाय वा सम्प्रदायमा सीमित नभई राष्ट्रिय एकता, सामाजिक सद्भाव र आध्यात्मिक चेतनाको साझा मञ्चका रूपमा आयोजना गर्न लागिएको आयोजकको भनाइ छ। सम्मेलनलाई सफल बनाउन सम्पूर्ण धर्मप्रेमी, राष्ट्रप्रेमी, बुद्धिजीवी, व्यवसायी, सञ्चारकर्मी तथा आम नागरिकलाई उपस्थितिका लागि आग्रह गरिएको छ।
