विराटनगर । नेपालका सातवटै प्रदेश सरकारले आज आगामी आर्थिक वर्ष २०८३/८४ का लागि वार्षिक बजेट सार्वजनिक गर्दैछन्।
कार्यतालिकाअनुसार मधेश प्रदेशले दिउँसो १ बजे, कर्णाली प्रदेशले ३ बजे, कोशी, बागमती र गण्डकी प्रदेशले अपराह्न ४ बजे तथा लुम्बिनी र सुदूरपश्चिम प्रदेशले अपराह्न ५ बजे बजेट प्रस्तुत गर्नेछन्।
संवैधानिक व्यवस्थाअनुसार प्रदेश सरकारले प्रत्येक वर्ष असार १ गते आगामी आर्थिक वर्षको वार्षिक बजेट प्रदेश सभामा पेश गर्नुपर्ने प्रावधान छ। सोही व्यवस्थाअनुसार सबै प्रदेश सरकारले आज बजेट ल्याउन लागेका हुन्।
प्रदेश सरकारहरूले सुशासन, कृषि, शिक्षा, स्वास्थ्य तथा भौतिक पूर्वाधार विकासलाई प्राथमिकतामा राख्दै बजेट तयारी गरेका छन्।
बजेटमार्फत विकास निर्माणका कार्यक्रम, सेवा प्रवाह सुधार तथा आर्थिक गतिविधि प्रवर्द्धनमा जोड दिइने अपेक्षा गरिएको छ।
