एजेन्सी । विश्वका धनी व्यक्तिहरूमध्ये अग्रस्थानमा रहेका एलन मस्कले अर्को ऐतिहासिक कीर्तिमान कायम गरेका छन्। रकेट तथा अन्तरिक्ष प्रविधि कम्पनी स्पेसएक्सको बहुप्रतीक्षित आईपीओ सेयर बजारमा सूचीकृत भएसँगै मस्क विश्वकै पहिलो ट्रिलियन डलर सम्पत्ति भएका व्यक्ति बनेका छन्।
विश्वकै सबैभन्दा ठूलो आईपीओका रूपमा हेरिएको स्पेसएक्स नास्डाक सेयर बजारमा २.२ ट्रिलियन अमेरिकी डलर मूल्याङ्कनसहित सूचीकृत भएको हो। कम्पनीको सेयर बजार प्रवेशसँगै मस्कको कुल सम्पत्ति १.११ ट्रिलियन डलर पुगेको बताइएको छ, जसले उनलाई विश्वकै सबैभन्दा धनी व्यक्तिको स्थानमा झन् मजबुत बनाएको छ।
स्पेसएक्सले प्रति सेयर १३५ डलर मूल्य निर्धारण गरेको थियो। तर कारोबार सुरु हुनासाथ लगानीकर्ताको उच्च आकर्षणका कारण सेयर मूल्य १५० डलर पुगेको थियो भने केही समयका लागि १७६.५० डलरसम्म उक्लिएको थियो। कारोबार बन्द हुँदा कम्पनीको सेयर मूल्य करिब १६१ डलरमा कायम रह्यो।
यस ऐतिहासिक आईपीओमार्फत स्पेसएक्सले ७५ अर्ब डलरभन्दा बढी पूँजी संकलन गरेको छ। कम्पनीमा मस्कको ४२ प्रतिशत स्वामित्व रहेकाले प्रमुख निर्णयहरूमा उनको प्रभाव लगभग पूर्ण रूपमा कायम रहनेछ।
ब्लूमबर्गका अनुसार स्पेसएक्समा रहेको मस्कको हिस्साको मूल्य मात्रै ७६७ अर्ब डलर नाघेको छ। टेस्ला र अन्य कम्पनीहरूमा रहेको उनको लगानी जोड्दा कुल सम्पत्ति १.११ ट्रिलियन डलर पुगेको हो। यो रकम पोल्यान्ड वा स्विट्जरल्यान्डजस्ता देशहरूको वार्षिक कुल गार्हस्थ उत्पादन (जीडीपी) सरह रहेको बताइएको छ।
मस्कको अभूतपूर्व सम्पत्तिले विश्वभर सम्पत्ति असमानताबारेको बहसलाई फेरि ताताएको छ। अमेरिकी सिनेटर बर्नी स्यान्डर्स र एलिजाबेथ वारेनले यति ठूलो सम्पत्तिलाई चिन्ताको विषय भन्दै अति धनी व्यक्तिमाथि थप कर लगाउनुपर्ने धारणा सार्वजनिक गरेका छन्।
यद्यपि मस्कको अधिकांश सम्पत्ति कम्पनीहरूको सेयर मूल्यमा आधारित भएकाले यसलाई ‘पेपर वेल्थ’ अर्थात् कागजी सम्पत्ति मानिन्छ। आईपीओ सम्झौताअनुसार उनले कम्तीमा एक वर्षसम्म आफ्ना स्पेसएक्सका सेयर बिक्री गर्न पाउने छैनन्।
स्पेसएक्सको बजार प्रवेशसँगै एलन मस्कले केवल व्यवसायिक इतिहासमै नयाँ अध्याय थपेका छैनन्, विश्व अर्थतन्त्र र सम्पत्तिको असमान वितरणबारेको बहसलाई पनि नयाँ उचाइमा पुर्याएका छन्।
