अछाम । अछामको कमलबजार नगरपालिका–७ स्थित क्वाल्लेखमा गएराति जिप दुर्घटना हुँदा एक जनाको मृत्यु भएको छ भने दुई जना घाइते भएका छन्।
तुर्माखाँद गाउँपालिका–३ निवासी २६ वर्षीय पुष्प बुढाले चलाएको से १ ज ६१३ नम्बरको जिप सडकबाट करिब २०० मिटर तल खस्दा कमलबजार नगरपालिका–७ का ३४ वर्षीय कर्ण भाट गम्भीर घाइते भएका थिए। उनको जिल्ला अस्पताल मङ्गलसेनमा उपचारका क्रममा मृत्यु भएको प्रहरीले जनाएको छ।
दुर्घटनामा मृतकका १३ वर्षीय छोरा मीनबहादुर भाट र ३० वर्षीय बद्री भाट घाइते भएका छन्। उनीहरूलाई थप उपचारका लागि प्रादेशिक अस्पताल सुर्खेत रेफर गरिएको छ।
घटनापछि इलाका प्रहरी कार्यालय कमलबजारबाट प्रहरी निरीक्षक सरोजकुमार कैलाको नेतृत्वमा खटिएको टोलीले घाइतेहरूको उद्धार गरी अस्पताल पुर्याएको थियो।
दुर्घटनामा संलग्न जिप चालकलाई प्रहरीले नियन्त्रणमा लिएको छ भने दुर्घटनाको कारणबारे थप अनुसन्धान भइरहेको जिल्ला प्रहरी कार्यालय अछामले जनाएको छ।
