काठमाडौं । नेपाली बजारमा आइतबार सुनचाँदीको मूल्यमा उल्लेख्य गिरावट आएको छ। नेपाल सुनचाँदी व्यवसायी महासंघका अनुसार सुनको भाउ एकैदिन प्रतितोला ८ हजार २ सय रुपैयाँले घटेको हो।
अघिल्लो कारोबार दिन प्रतितोला ३ लाख ९ हजार रुपैयाँमा कारोबार भएको छापावाल सुनको मूल्य आइतबार घटेर ३ लाख ८ सय रुपैयाँ कायम भएको महासंघले जनाएको छ। गत आइतबार सुनको मूल्य प्रतितोला ३ लाख ११ हजार १ सय रुपैयाँ रहेको थियो।
त्यसैगरी चाँदीको मूल्य पनि घटेको छ। अघिल्लो दिन प्रतितोला ५ हजार २३० रुपैयाँ रहेको चाँदी आइतबार ३३५ रुपैयाँले घटेर ४ हजार ८९५ रुपैयाँमा कारोबार भइरहेको छ।
गत साताको तुलनामा पनि चाँदीको मूल्य घटेको देखिएको छ। गत आइतबार प्रतितोला ५ हजार ३४५ रुपैयाँ रहेको चाँदीको मूल्य अहिले उल्लेख्य रूपमा तल झरेको छ।
अन्तर्राष्ट्रिय बजारमा सुनचाँदीको मूल्यमा आएको उतारचढावको प्रभाव नेपाली बजारमा समेत परेको व्यवसायीहरू बताउँछन्। सुनको मूल्यमा आएको यो गिरावट पछिल्ला दिनकै ठूलो दैनिक कमीमध्ये एक मानिएको छ।
