काठमाडौं । नेपाल कम्युनिष्ट पार्टी (नेकपा) का नेता तथा पूर्वअर्थमन्त्री वर्षमान पुन ले सरकारले ल्याएको आगामी आर्थिक वर्ष २०८३/८४ को बजेटले आर्थिक वृद्धि, रोजगारी सृजना र मुलुकको रूपान्तरणका लागि स्पष्ट दिशा दिन नसकेको टिप्पणी गरेका छन्।
नेपाल व्यवस्थापन संघद्वारा शुक्रबार राजधानीमा आयोजित बजेटपछिको अन्तरक्रिया कार्यक्रममा बोल्दै पुनले दुई तिहाइ नजिकको शक्तिशाली सरकारले आवश्यकताअनुसार परिणाममुखी बजेट ल्याउन नसकेको बताए।
उनले बजेटमा धेरै लोकप्रिय र सबैलाई मनपर्ने कार्यक्रम समेटिए पनि त्यसले देशको आर्थिक समृद्धिमा ठोस नतिजा दिन नसक्ने धारणा राखे। बजेटमा सबै दलका एजेन्डा समेट्ने प्रयास गरिएको देखिए पनि सरकारको आफ्नै प्राथमिकता, नीति र दृष्टिकोण स्पष्ट रूपमा प्रस्तुत हुन नसकेको उनको भनाइ थियो।
“बजेट हेर्दा सबै कुरा भएको जस्तो देखिन्छ, तर केमार्फत आर्थिक वृद्धि गर्ने, केमार्फत रोजगारी सिर्जना गर्ने र देशलाई कसरी रूपान्तरण गर्ने भन्ने विषयमा स्पष्ट केन्द्रबिन्दु देखिँदैन,” पुनले भने।
उनले सरकारले आर्थिक विकासको मुख्य आधार के हो भन्ने विषयमा स्पष्ट प्राथमिकता निर्धारण गर्न नसकेको आरोप लगाए। बजेटमा धेरै कार्यक्रम समेटिए पनि परिणाम दिने गरी कुनै क्षेत्रलाई विशेष प्राथमिकतामा नराखिएको उनको तर्क थियो।
पुनले बजेटको विशेषता “हेर्दा, सुन्दा र छाम्दा धेरै देखिने तर परिणाम कम दिने” खालको रहेको टिप्पणी गर्दै स्पष्ट लक्ष्य र केन्द्रित कार्यक्रमबिना अपेक्षित उपलब्धि हासिल गर्न कठिन हुने बताए।
पूर्वअर्थमन्त्री पुनको यो टिप्पणी बजेटमाथिको राजनीतिक बहसका बीच आएको हो। सरकार भने बजेटले आर्थिक गतिविधि विस्तार, रोजगारी सिर्जना र उत्पादन वृद्धि गर्ने लक्ष्य लिएको दाबी गर्दै आएको छ।
