धनकुटा । चौबिसे गाउँपालिकाले गाउँपालिकावासीलाई सहज स्वास्थ्य सेवा उपलब्ध गराउने उद्देश्यले वडा नं. २ स्थित शुक्रबारेमा एकदिने निःशुल्क आयुर्वेद स्वास्थ्य शिविर सञ्चालन गरेको छ।
वडा अध्यक्ष एनोज तुम्साज्यूको अध्यक्षतामा सम्पन्न शिविरमा १८० जना स्थानीयवासीले स्वास्थ्य परीक्षण, परामर्श तथा उपचार सेवा प्राप्त गरेका छन्। सेवाग्राहीहरूलाई गाउँपालिकाको तर्फबाट निःशुल्क आयुर्वेदिक औषधिसमेत वितरण गरिएको थियो।
शिविर सञ्चालनका लागि वडा कार्यालय र शुक्रबारे स्वास्थ्य चौकीले आवश्यक समन्वय तथा सहजीकरण गरेका थिए। शिविरमा ग्यास्ट्राइटिस, बाथ तथा जोर्नी दुखाइ, पिनास, दम, बवासीर, खोकी, विभिन्न प्रकारका शारीरिक दुखाइ, शरीर सुन्निने समस्या, महिनावारीसम्बन्धी समस्या तथा दाँत दुख्ने लगायतका रोगहरूको परीक्षण, परामर्श र उपचार सेवा प्रदान गरिएको थियो।
गाउँपालिकाका अनुसार स्थानीय समुदायलाई घर नजिकै गुणस्तरीय आयुर्वेद स्वास्थ्य सेवा उपलब्ध गराउने उद्देश्यले शिविर आयोजना गरिएको हो। शिविरले स्वास्थ्य सचेतना अभिवृद्धिसँगै रोगको पहिचान र व्यवस्थापनमा समेत सकारात्मक योगदान पुर्याएको जनाइएको छ।
यही जेठ २२ गते बिहान ९ बजेदेखि साँझ ६ः३० बजेसम्म सञ्चालन भएको शिविरमा वैद्य नितु यादव तथा जनस्वास्थ्य अधिकृत नितु यादवले स्वास्थ्य सेवा प्रदान गरेकी थिइन्।
शिविरबाट लाभान्वित स्थानीयवासीहरूले गाउँपालिकाले स्वास्थ्य सेवालाई प्राथमिकता दिएको भन्दै यस्ता कार्यक्रमलाई आगामी दिनमा पनि निरन्तर सञ्चालन गर्न आग्रह गरेका छन् ।
