विराटनगर । चीनका राष्ट्रपति सी जिनपिङ आगामी साता उत्तर कोरियाको दुई दिने राजकीय भ्रमणमा जाने भएका छन्।
चिनियाँ सरकारी समाचार संस्था सिन्ह्वाका अनुसार उनले उत्तर कोरियाली नेता किम जोङ उनसँग भेटवार्ता गर्नेछन्। सन् २०१९ पछि यो सीको पहिलो उत्तर कोरिया भ्रमण हो भने सन् २०२६ को पहिलो विदेश भ्रमण पनि हुनेछ ।
भ्रमणलाई चीन–उत्तर कोरिया सम्बन्ध मजबुत बनाउने तथा क्षेत्रीय शक्ति सन्तुलनमा चीनको भूमिकालाई थप प्रभावशाली बनाउने प्रयासका रूपमा हेरिएको छ।
विश्लेषकहरूका अनुसार यो भ्रमणले अमेरिका–उत्तर कोरिया सम्भावित संवाद पुनः सुरु गराउने मध्यस्थतामा चीनको भूमिका बढाउन सक्ने अनुमान गरिएको छ।
उत्तर कोरियाले भने हालै पनि आफ्नो आणविक कार्यक्रम विस्तार जारी राखेको छ, जसले क्षेत्रीय तनावलाई अझ बढाएको छ। यो भ्रमण दुई देशबीच सन् १९६१ मा भएको मैत्री तथा पारस्परिक सहायता सन्धिको ६५औँ वार्षिकोत्सवको अवसरमा हुन लागेको हो।
