विराटनगर । प्रधानमन्त्री वालेन्द्र शाहले आइतबार प्रतिनिधिसभाको बैठकमा भारतसँगको सीमा समस्याबारे दिएको अभिव्यक्तिपछि त्यसको प्रभाव सीमा क्षेत्रमा देखिन थालेको छ।
नवलपरासी बर्दघाट सुस्ता पश्चिमको सुस्ता क्षेत्रमा भारतीय सशस्त्र सीमा बल (एसएसबी) ले नेपाली भूमिमा निर्माणाधीन तटबन्धको काममा अवरोध गरेको स्थानीयले बताएका छन्।
स्थानीयका अनुसार एसएसबीको टोली नेपाली भूमिमा प्रवेश गरी सुस्ता गाउँपालिका–५ मा निर्माण भइरहेको तटबन्धको काम रोक्न दबाब दिन पुगेको थियो। सुस्ता गाउँपालिकाका अध्यक्ष टेकनारायण उपाध्यायले निर्माणस्थलमा भारतीय सुरक्षाकर्मी आएर काम रोक्न चेतावनी दिएको स्थानीयबाट जानकारी पाएको बताए । उनका अनुसार आयोजनाको ८० प्रतिशत काम सकिइसकेको छ ।
भारतीय पक्षले दाबी गरेको क्षेत्रभन्दा निकै भित्र नेपालकै भूभागमा तटबन्ध निर्माण भइरहेको उनले स्पष्ट पारे। निर्माणाधीन तटबन्धभन्दा करिब ५० मिटर पूर्वतर्फ नेपालकै भूभागमा नयाँ ठेक्काअन्तर्गत बाँध निर्माण गरिएको छ।
गृह मन्त्रालयका अनुसार सुस्ता–५ स्थित नारायणी नदीको झोलुङ्गे पुल नजिक सिँचाइ विभागको परियोजनाअन्तर्गत करिब एक किलोमिटर तथा थप १३२ मिटर तटबन्ध निर्माण भइरहेको छ। यसको मुख्य उद्देश्य नदी कटान तथा बाढीजन्य जोखिमबाट सुस्ता क्षेत्रलाई जोगाउनु रहेको छ।
सुस्ता क्षेत्र लामो समयदेखि नेपाल–भारत सीमा विवादको केन्द्र बन्दै आएको छ। स्थानीयका अनुसार २०३० सालअघि करिब ७५ हजार हेक्टर क्षेत्रफल रहेको सुस्ता अहिले झन्डै ७ हजार हेक्टरमा सीमित भएको छ।
उत्तर र पश्चिमतर्फ नारायणी नदी तथा दक्षिण र पूर्वतर्फ भारतको बिहार राज्यले घेरेको यो क्षेत्र नदीको बहाव परिवर्तनसँगै विवादित बन्दै गएको छ।
