रुकुमपश्चिम । आफ्नी भाइ बुहारीलाई जबरजस्ती करणी गरेको आरोपमा जेठाजु पक्राउ परेका छन् । जिल्ला प्रहरी कार्यालय, रुकुम पश्चिमले अदालतबाट म्याद थप गरेर उनीमाथि अनुसन्धान थालेको छ ।
घटना रुकुम पश्चिमको सानीभेरी गाउँपालिका–९ को हो । आठबिसकोट नगरपालिकाकी एक महिलाले कर्णबहादुर खड्कासँग भागी विवाह गरेकी थिइन् ।
विवाहलगत्तै कर्णबहादुर रोजगारीका लागि भारत गए । सोही मौकामा जेठाजु राजकुमार खड्का र गाउँका ससुरा नाता पर्ने नवराज खड्काले उनीमाथि जबरजस्ती करणी गरेका हुन् ।
उनको पेटमा चार महिनाको गर्भ छ । पीडितले दुवै जनाविरुद्ध प्रहरीमा जाहेरी दिएकोमा बच्चा कसको हो भन्ने खुल्न सकेको छैन ।
प्रहरीले जेठाजु खड्काउपर अनुसन्धान गरिरहेको छ । ससुरा पर्ने खड्का भने मलेसिया फरार भएका छन् । पीडित महिलाका अनुसार ससुराले झोलिलो पेय पदार्थ खुवाएर आफूमाथि बलात्कार गरेका हुन् ।
उनले भनिन्, ‘उहाँ मोबाइल चार्ज गर्ने निहुँमा मेरो घरमा आउनुभएको थियो । सोही मौकामा झोलिलो पदार्थ खुवाएर अर्धचेत भएपछि उहाँले ममाथि बलात्कार गर्नुभएको हो ।’
जिप्रकाका सूचना अधिकारी प्रहरी निरीक्षक हरिप्रसाद पुनका अनुसार राजकुमार नभई किरण खड्का पक्राउ परेका छन् ।
बलात्कारको कसुरमा पक्राउ परेका उनको घर सानीभेरी गाउँपालिका–९ हो । उनले भने, ‘राजकुमार भन्ने छैनन्, किरण खड्का भने गत वैशाख २९ गते समातिएका छन् । उनी सानीभेरीकै हुन् । अदालतबाट म्याद थप गरेर हामीले अनुसन्धान गरिरहेका छौं ।’
