सुनसरी । फरवार्ड माइक्रोफाइनान्स लघुवित्त वित्तीय संस्था को १३औँ वार्षिक साधारण सभाले संस्थाकी संस्थापक अध्यक्ष भगवती चौधरीलाई पुनः अध्यक्ष पदमा निर्विरोध चयन गरेको छ।
चौधरीलाई नेपाल राष्ट्र बैंकका निर्देशक शैलेन्द्र रेग्मीले पद तथा गोपनीयताको सपथ गराएका थिए।
सो अवसरमा उनले लघुवित्तको उद्देश्य र गरिमा बढाउने तथा ग्रामीण अर्थतन्त्र, महिला सशक्तिकरण, युवा उद्यमशीलता र स्वरोजगार प्रवर्द्धनमा सक्रिय रूपमा काम गर्ने प्रतिबद्धता जनाइन्।
चौधरीले ग्रामीण महिला उत्सुकता विकास मञ्चमार्फत महिलाहरूमा सामाजिक चेतना र वित्तीय साक्षरता कार्यक्रम सञ्चालन गर्दै आएकी छन्। फरवार्ड माइक्रोफाइनान्सको स्थापना पनि उनीकै पहलमा भएको हो, जसले हाल ४० जिल्लाका ३८२ स्थानीय निकायमा १५९ शाखामार्फत करिब २ लाख ८४ हजार विपन्न परिवारलाई वित्तीय सेवा प्रदान गर्दै आएको छ।
