काठमाडौं । सपना प्रधान मल्ल २० दिनका लागि बिदामा बसेकी छन् । डा. मनोज कुमार शर्माको प्रधानन्यायाधीशमा नियुक्तिसँगै मल्ल बिदामा बसेकी हुन् ।
सर्वोच्च अदालतका प्रवक्ता अर्जुन कोइरालाले न्यायाधीश मल्ल २० दिन बिदामा बसेको जानकारी दिएका छन् ।
यसअघि प्रधानन्यायाधीश प्रकाशमानसिंह राउत ६५ वर्षे उमेरहदका कारण अवकाश भएपछि वरिष्ठतम न्यायाधीश मल्लले २०८२ चैत १८ गतेदेखि कामु प्रधानन्यायाधीशको जिम्मेवारी सम्हाल्दै आएकी थिइन् ।
तर संवैधानिक परिषद्ले आफूभन्दा जुनियर रहेका डा. शर्मालाई प्रधानन्यायाधीश नियुक्तिका लागि सिफारिस गरेपछि मल्ल असन्तुष्ट रहेको बताइएको छ ।
डा. शर्माले मंगलबार संसदीय सुनुवाइ प्रक्रिया पूरा गरेपछि सोही दिन शपथ ग्रहण गर्दै पदभार ग्रहण गरिसकेका छन् । तर उनको शपथ ग्रहण समारोहमा न्यायाधीश सपना प्रधान मल्ल सहभागी नभएको जनाइएको छ ।
