इटहरी । शारीरिक रूपमा अशक्त मोरङ रतुवामाई–९ का रामबहादुर थापाले बिहीबार आफ्नो ८०औँ जन्मदिन इटहरीस्थित माया घर नेपालमा आश्रितहरूलाई खाना खुवाएर भव्य रूपमा मनाएका छन् ।
मोरङको रतुवामाईबाट ह्विलचेयरमा माया घर इटहरी पुगेका थापाले त्यहाँ आश्रितहरूलाई एक छाकको भोजनसँगै दिवा खाजा प्रदान गरी ८०औँ जन्मदिन मनाएका हुन् । उनीसँगै जीवनसंगिनी टिकामाया थापा, साइली बुहारी बिमला थापा लगायत परिवारको उपस्थितिमा माया घर नेपालमा केक काटेर जन्मदिन मनाइएको हो ।
८०औँ वर्ष प्रवेश गरेसँगै जन्मदिनलाई सामाजिक काममा जोड्ने उद्देश्यसहित माया घरमा पुगेर आश्रितहरूलाई एक छाक मिष्ठान्न भोजन गराएको थापाकी साइली बुहारी बिमलाले बताइन् ।जन्मदिनमा हुने पारिवारिक भेटघाट र फजुल खर्च नगरी सामाजिक क्षेत्रमा योगदान दिने उद्देश्यसहित यो काम गरिएको उनको भनाइ छ ।
सामाजिक सञ्जालमा माया घर नेपालबारे सुन्दै र हेर्दै आएकोले बुवाको जन्मदिनको अवसरमा थोरै भए पनि पुण्य कमाउने उद्देश्यले आश्रितहरूलाई एक छाक मिष्ठान्न भोजन प्रदान गरिएको उनको भनाइ छ । हाल माया घर नेपालमा १३९ जना अशक्त, मानसिक रोगी तथा सडक मानवहरू आश्रित रहेका छन् ।
साथै बिहीबार एकै दिन माया घर नेपालमा ९ जनाभन्दा बढीले जन्मदिनको उत्सव मनाएका छन् । मोरङ सुन्दरहरैंचा–१२ निवासी दिपसिखा खतिवडाले आफ्नो जन्मदिनको अवसरमा माया घरका आश्रितहरूलाई एक छाक मिष्ठान्न भोजन प्रदान गरेकी छन् ।
त्यस्तै मोरङकै पथरी शनिश्चरेकी सुम्निमा राईले पनि आश्रितहरूलाई खाद्यान्न सामग्री प्रदान गरेकी छन् । उनले आफ्नो जन्मदिनको अवसर पारेर १५ हजार मूल्य बराबरको खाद्यान्न सामग्री प्रदान गरेकी हुन् । उनीजस्तै अन्य ९ जनाभन्दा बढीले माया घर पुगेर जन्मदिनको अवसरमा आश्रितहरूलाई खाद्यान्न, लत्ताकपडा र भोजन गराएका हुन् ।
