गत मङ्गलबार आयोजित कार्यक्रममा व्यापार, पारवहन, ढुवानी, सम्पर्क सञ्जाल तथा लगानीका क्षेत्रमा नेपाल–भारत सहकार्यलाई थप प्रभावकारी बनाउने विषयमा छलफल भएको महावाणिज्यदूतावासले जनाएको छ । कार्यक्रममा नेपालको व्यापार तथा पारवहन संरचना, लगानीका सम्भावना तथा द्विपक्षीय आर्थिक सहकार्य सुदृढ गर्ने प्रयासबारे पनि विमर्श गरिएको थियो ।
कार्यक्रममा श्यामाप्रसाद मुखर्जी बन्दरगाहका अध्यक्ष राजेन्द्र रमनसहित वरिष्ठ अधिकारी, कोलकाता भन्सार कार्यालयका प्रतिनिधि, जल यातायात तथा ढुवानी सेवा प्रदायक, कस्टम हाउस एजेन्ट्स एसोसिएसनका प्रतिनिधि, आयातकर्ता, निर्यातकर्ता, लगानीकर्ता, नेपाली व्यवसायी, सञ्चारकर्मी तथा सार्वजनिक र निजी क्षेत्रका प्रतिनिधिहरूको सहभागिता रहेको थियो ।
त्यसैगरी, बन्दरगाहका ट्राफिक प्रबन्धक रविशङ्कर राजहंसले उपलब्ध सुविधा, पूर्वाधार विकास र नेपालतर्फ जाने मालसामानको ढुवानी सहज बनाउन अपनाइएका उपायबारे जानकारी दिएका थिए ।
कार्यक्रममा सहभागीहरूले व्यापार सहजीकरण, भन्सार समन्वय, ढुवानी व्यवस्थापन, सम्पर्क सञ्जाल विस्तार तथा लगानी प्रवर्द्धनसम्बन्धी सुझाव राखेका थिए । सहभागीले उठाएका जिज्ञासा तथा समस्याबारे महावाणिज्यदूत झक्कप्रसाद आचार्यले जवाफ दिएका थिए ।
महावाणिज्यदूत आचार्यले नेपाल–भारतबीच व्यापार सहजीकरण, सम्पर्क सञ्जाल विस्तार तथा द्विपक्षीय आर्थिक सहकार्य प्रवर्द्धनका लागि निरन्तर सहकार्य गर्ने प्रतिबद्धता व्यक्त गरेका छन् ।
