मोरङको सुन्दरहरैंचा नगरपालिका–३ गछियाका १५ वर्षीय श्रजल दाहाल ब्लड क्यान्सरसँग संघर्षरत छन् । यस वर्ष मात्रै माध्यमिक शिक्षा परीक्षा (एसइई) पूरा गरेका श्रजल हाल भारतस्थित राजीव गान्धी क्यान्सर इन्स्टिच्युट एन्ड रिसर्च सेन्टरमा उपचाररत छन् ।
श्रजलको उपचारमा संलग्न चिकित्सकहरूका अनुसार उनलाई एक्युट लिम्फोब्लास्टिक ल्युकेमिया नामक रोग छ । श्रजलका बुबा नूतन दाहाल र आमा उमा देवी भट्टराईले छोराको उपचारका लागि निरन्तर प्रयास गरिरहे पनि उपचार खर्च अत्यधिक बढ्दै गएपछि आर्थिक समस्या झेल्नुपरेको बताएका छन् ।
परिवारका अनुसार श्रजलको उपचारका लागि ठूलो रकम आवश्यक पर्ने भएकाले सहयोगी मन भएका व्यक्ति, संघसंस्था तथा समाजसेवीहरूसँग आर्थिक सहयोगको अपिल गरिएको छ ।
परिवारले श्रजललाई बचाउन सबैको साथ, सहयोग र प्रार्थनाको आवश्यकता रहेको जनाएको छ । सानै उमेरमा गम्भीर रोगसँग जुधिरहेका श्रजलको उपचारमा सहयोग पुग्ने विश्वाससहित परिवारले मानवीय सहयोगका लागि सबैमा आग्रह गरेको छ ।
