झोराहाट । ग्रामथान गाउँपालिका–२ झोराहाटस्थित जनक मेमोरियल बोर्डिङ स्कुल ले माध्यमिक शिक्षा परीक्षा (एसइई) २०८२ मा शतप्रतिशत नतिजा हासिल गर्दै उत्कृष्ट सफलता प्राप्त गरेको छ ।
विद्यालयका अनुसार यस वर्षको एसइई परीक्षामा ३५ जना सहभागी भएकोमध्ये सन्देश सुवेदी र सम्पदा कोइरालासहित १३ जनाले ३.६ देखि उत्कृष्ट जिपिए ल्याएका छन् । यसैगरी, अरू २२ जनाले ३.२ देखि ३.६ जिपिए प्राप्त गरेको विद्यालयका प्रिन्सिपल सुनील भगतले जानकारी दिए ।
उत्कृष्ट सफलता हासिल गर्ने सम्पूर्ण विद्यार्थीहरूलाई विद्यालय परिवारले हार्दिक बधाई तथा उज्ज्वल भविष्यको शुभकामना व्यक्त गरेको छ । प्रिन्सिपल भगतले विद्यार्थीहरूको लगनशीलता, आत्मविश्वास र अनुशासनसँगै अभिभावक तथा गुरु वर्गको निरन्तर कडा मेहनतका कारण यो सफलता सम्भव भएको बताएका छन् ।
यस्तै, विद्यालय व्यवस्थापन समितिका अध्यक्ष बद्रीप्रसाद रिजालले जनक स्कुल विगत ३४ वर्षदेखि शिक्षा क्षेत्रमा निरन्तर योगदान दिन सफल भएको बताउँदै एसइईको नतिजाले आफूहरूको मनोबल अझ बढेको बताए ।
उनले आगामी दिनमा पनि विद्यार्थीहरूले अझ उच्च सफलता हासिल गर्दै जीवनका हरेक क्षेत्रमा प्रगति गर्ने विश्वास व्यक्त गरेका छन् । पालिकाभरि नै उत्कृष्ट नतिजा ल्याउन सफल जनकमा हाल एक हजारभन्दा बढी विद्यार्थी अध्ययनरत छन् ।
