विराटनगर । कोशी प्रदेशमा २ हजार ६ सय २३ जना एचआईभी संक्रमितले नियमित रूपमा एन्टिरेट्रोभाइरल थेरापी (एआरटी) सेवा लिइरहेका छन्।
एड्स हेल्थ केयर फाउन्डेसन (एएचएफ) नेपालसँगको समन्वयमा प्रदेशका ११ वटा केन्द्रमार्फत संक्रमितहरूलाई उपचार तथा परामर्श सेवा उपलब्ध गराइँदै आएको हो।
विराटनगरमा शुक्रबार आयोजित कार्यक्रममा एएचएफ नेपालका मेडिकल एडभाइजर डा. उन्नत श्रेष्ठले देशभर ३० हजारभन्दा बढी एचआईभी संक्रमित रहेको जानकारी दिँदै कोशी प्रदेशमा उपचार पहुँच विस्तार हुँदै गएको बताए।
उनका अनुसार यौनकर्मी, समलिंगी, कैदीबन्दी तथा वैदेशिक रोजगारीबाट फर्किएका व्यक्तिहरूमा संक्रमणको दर तुलनात्मक रूपमा बढी देखिएको छ।
“सन् २०३० सम्म एचआईभी एड्सलाई जनस्वास्थ्य समस्याको रूपमा अन्त्य गर्ने लक्ष्य लिइएको छ,” डा. श्रेष्ठले भने, “यसका लागि राज्य, समुदाय र सरोकारवालाको सक्रिय सहकार्य आवश्यक छ।”
स्वास्थ्य कार्यालय मोरङका प्रमुख योगराज घिमिरेले संक्रमण नियन्त्रणका लागि समुदायस्तरमै सचेतना अभिवृद्धि गर्नु अहिलेको मुख्य चुनौती रहेको बताए।
उनका अनुसार कोशी प्रदेशका संक्रमितमध्ये २५ देखि ४९ वर्ष उमेर समूहका व्यक्तिहरूको संख्या अत्यधिक छ। उत्पादक उमेर समूह नै बढी प्रभावित हुनु सामाजिक तथा आर्थिक दृष्टिले समेत चुनौतीपूर्ण रहेको स्वास्थ्यकर्मीहरूको भनाइ छ।
प्रदेशका एआरटी केन्द्रहरूले संक्रमितलाई निःशुल्क रूपमा एचआईभी परीक्षण, परामर्श, कन्डम वितरण, एआरटी औषधि, यौन रोगसम्बन्धी सेवा, भाइरल लोड परीक्षण, ईआईडी परीक्षण तथा आमाबाट बच्चामा संक्रमण सर्न नदिने पीएमटीसीटी सेवा उपलब्ध गराउँदै आएका छन्।
